(Dili) Mudansa – Deputada Bankada Congresu Nasional Rekonstrusaun Timor (CNRT) Carlemelita Moniz informa, Povu koñese di’ak partidu CNRT tanba kór Bandeira la hanesan ho Bandeira sira seluk tanba ne’e CNRT sei manán maioria iha eleisaun parlamentár.
“Numeru 12 ne’e vitória, CNRT nia esperansa sei okupa primeiru mais votadu iha Eleisaun Parlamentar, militantes simpatizante kuadrus partidu CNRT nian husi Nasional to’o baze ita númeru sorteiu maka 12 númeru ne’ebé vitória ba ita atu servisu makas halo Edukasaun votante iha terenu hodi hatete ba eleitorál sira labele vota sala iha loron 21 fulan maiu.” Dehan Deputada Bankada CNRT Carlemelita Moniz iha Tribunal Rekursu Dili, kuarta, 29/03/23.
Nia akresenta, dala ida tan CNRT nia numeru sorteiu maka 12, CNRT iha Baindeira foto maun boot prezidente partidu nian fiar katak eleitores sira sei la hili sala.
Iha fatin hanesan Deputadu bankada CNRT Patrocinio Fernandes argumenta, partidu CNRT iha tinan 7 liu ba hahú ona konsolidasaun povu hatene ona kór CNRT tanba ne’e nia fiar eleitorál sei la hili sala.
“Maske besik malu ho partidu sira seluk maibé militantes hotu hatene hela kór partidu CNRT nian.” Nia hakotu.
Husi numeru sorteiu ne’e Partido Dezenvolvimento Nasiona (PDN) numeru 1, Partidu Liberta Povo Aileba (PLPA) numeru 2, Partido Livertasaun Popular (PLP) numeru 3, Partido Demokratiku (PD) numeru 4, Kmanek Haburas Unidade Nasionál Timor Oan (KHUNTO) 5, Partido Os Verdes de Timor (PVT) numeru 6, Uniaun Democratica Timorense (UDT) 7, Partido Unidade Dezenvolvimentu Democratico (PUDD) numeru 8, Partido Republicano (PR) numeru 9,
Unidade Nasionál Democratica de Resistensia Timorese (UNDERTIM) numeru 10, Frente Revolusionario do Timor-Leste Independensia (FRETILIN) 11, Congreso Nasional Rekonsteução Timorense (CNRT) numeru 12, Centro Asão Sosial Demokratica Timorense (CASDT) numeru 13, Movimento Libertasão do Povo Maubere (MPLM) numeru 14, Partido Sosialista Timor (PST) numeru 15, Partido Democrata Cristão (PDC) numeru 16, no ikus liu Assosiasão popular Monarquia Timorense (APMT) ho numeru sorteiu 17.
Jornalista : Delfina Borges
Editór : Orlando Magno
