(Dili) Mudansa – Komisaun Nasional Eleisaun(sigla Portugues,CNE) fó sai kalendáriu kona-ba atividade no programa sira ne’ebé mak realiza husi fulan Marsu to’o Maiu 2023 ba preparasaun Eleisaun Parlamentar nian
Portavós Odete Maria Belo atuál Sekretaria CNE informa, hahú iha Fulan marsu to’o abríl 2023 CNE realiza atividade Edukasaun sívika iha Teritoriu Timor laran ne’ebé Primeiru faze realiza iha marsu nia laran no segundu faze sei realiza iha fulan abríl tinan ne’e.
Tanba ne’e molok hakat ba kampaña Eleitoral no Eleisaun Parlamentar CNE sei halo enkontru jerál ho Partidus Politikus, Polisia Nasional Timor-Leste (PNTL), Sekretariu Teknika Administrasaun Eleitoral (STAE), Ministeriu Justisa (MJ) no Ministeriu Negosiu Estranjeiru Kooperasaun (MNEK) kona-ba eleisaun Parlamentar tinan 2023 nian atu la’o ho di’ak
“Ami sei halo aprovasaun ba espesifikasaun tinta indelevel ba Eleisaun Parlamentar ne’ebé aprezenta husi STAE no apoiu husi United Nation Development Programe (UNDP), sei servisu hamutuk ho The Internasional Foundation For Electoral Systems (IFES) hodi disemina informasaun ba eleitór sira iha munisípiu hanesan Bobonaro, Ainaro, Ermera,Lautem no Viqueque,”Dehan Portavoz ba Joranlista iha Salaun Sentru Mídia CNE Dili, Kinta 30/03/04.
Nia informa CNE Sei halo supervizaun ba kampaña ne’ebé sei hahú iha loron 19 fulan abríl to’o dia 18 fulan Maiu konforme kalendáriu ne’ebé partidu polítiku sira submete mai iha CNE sei halo verifikasaun no aprovasaun, iha dia 14 fulan Abril
“Ami mós sei realiza konferénsia Nasional Pasifiku partisipa husi lideransa xave sira iha Nasaun ida ne’e sei realiza iha dia 12 fulan Abril tinan ne’e. Sei halo mós supervizaun imprime boletín votus atividade sei halo iha gráfiku Nasional”,Nia afirma
Tanba CNE simu kalendáriu ikus husi partidu polítiku sira submete mai iha ne’e tuir regulamentu loron 5 antes kampaña eleitorál no partidu polítiku konkorrente submete mai hodi halo aprovasaun no verifikasaun.
“Am Sei halo supervizaun ba materiál sensitivu no la sensitivu husi Dili ba Munisipiu sira no husi munisípiu sira mai iha Dili depoizde votasaun, Ami mós hamutuk ho Radio Televizaun Timor-Leste realiza atividade debate entre joven feto no mane potensiál, partidus polítiku sira konkorrente ba iha eleisaun Parlamentar tinan ne’e hahú husi dia 1 to’o dia 10 maiu, nune’e husi dia 16 to’o dia 18 debate entre lideransa másimu partidu polítiku sira iha salaun Oka,” Nia Informa
Enkuantu loron 18 maiu sei realiza misa simultánea ne’ebé mak organiza husi CNE selebra husi igreja katólika no konfisaun ho relijiaun sira ne’ebé mak eziste iha Timor Leste no sei realiza mós Workshop internasionál sira ne’ebé sei partisipa husi órgaun Eleitoral nian husi internasionál
“21 Maiu loron votasaun ami sei halo supervizaun ba votasaun no kontajen inisiál sira iha sentru votasaun iha territóriu tomak no 21 to’o 2023 maiu supervizaun ba apuramentu munisipál ne’ebé iha kada Munisípal 24 to’o 27 maiu sei halo apuramentu nasionál,”Katak nia
Entretantu CNE fo sai kalendáriu kona ba programa no atividade ne’ebé sira sei hala’o no nafatin husu ba jornalista atu akompaña nafatin atu Sosiedade ka Eleitor hatene saida mak CNE halo nune’e bele garante Eleisaun la’o ho di’ak no transparénsia.
Jornalista : Delfina Borges
Editor : Orlando Magno
