(Dili) Mudansa — Prezidente Repúblika (PR), José Ramos-Horta posibilidade sei termina prosesu konsultasaun ho partidu polítiku sira, atu nune’e semana oin, bele anunsia ona loron ba Eleisaun Parlamentar 2023.
Xefe Estadu Informa, kona-ba ajenda diálogu ho partidu polítika sira, agora la’o hela, no semana ne’e nia laran tenke konsulta hotu kedas. inklui sei konsulta mós ho Lider Karismátiku Kay Rala Xanana Gusmão, para segunda bele dekreta ona loron eleisaun.
“Ha’u sei ko’alia ho Avo Xanana dala ida, no ohin simu Partidu Sosialista ho ASDT maski sira la iha fatin iha Parlamentu, ha’u sente ne’e obrigasaun para rona sira, nune’e Segunda-feirras sei anunsia duni loron eleisaun ne’e,”hatete nia ba jornalista iha Palásiu Prezidensiál, Bairo-Pite, Kuartu (08/02).
Aman ba nasaun ne’e afirma, kona-ba opiniaun públiku balu katak eleisaun ne’e akontese entre fulan Maio ka Junho, ida-ne’e Prezidente seidauk bele hatete maibé tuir nia hanoin mak Segunda-feira tenke dekreta ona.
Aman ba nasaun ne’e fiar katak, prosesu hotu-hotu sei la’o normál, hanesan preparativus sira ne’e, la iha falta kona-ba finanseiru atubele sosa tan tinta ba ElPar nian, tanba Nasoens Unidas sei apoiu tinta espesiál ba TL.
Nia mós informa kona-ba lei foun iha Parlamentu Nasionál, bainhira sira diskute mak atraza, entaun di’ak liu uza lei antigu nian, para halo resenseamentu ba ema sira iha rai li’ur tuir fali tinan uluk nian nune’e sira mos bele ezerse sira-nia diretu votu.
Tanba iha momentu tinan 10 liu ba, Horta mós propoin tiha ona, partisipasaun liu husi korreu postal ne’e tanba sá, tanba sira hotu-hotu fasil liu.
Nia fó ezemplu, iha nasaun Amérika, ema juta ba juta, tinan 50 ona vota liu husi de’it koreu tanba ferik katuas sira rihun ba rihun iha Amerikanu, Europa no iha mundu ne’e sira vota liu husi korreu, maibé, Iha Timor-Leste, STAE ho Governu matenek boot sira nunka haree kestaun ida-ne’e no agora mak foin hanoin ba ida ne’e.
Jornalista: Julião da Silva
Editor : Orlando Magno
