(Dili) Mudansa – Programa Monitorizasaun ba Sistema Judisiáriu (JSMP) hasa’e advokasia no sosializasaun iha Komunidade nia leet hodi prevene ka redús Violensia hasoru Feto no Labarik Feto sira tanba ne’e JSMP husu ba feto no labarik sira atu ko’alia sai bainhira hasoru situasaun hanesan ne’e.
Tanba JSMP nu’udar organizasaun sosiedade sivíl ida ne’ebé ho nia vizaun atu harii no promove sosiedade demokrátiku ne’ebé garante justisa no diretu umanu ba ema hotu liu hosi observasaun regulár iha Parlamentu Nasional no Monitorizasaun iha tribunál sira
Aleinde ne’e fó mós asisténsia legál ba feto no labarik sira ne’ebé sai vítima iha krime violénsia doméstika, abuzu seksuál ba menór, violasaun seksuál no kazu sivíl sira kona-ba ezersísiu podér paternál.
Tanba JSMP serbisu hamutuk ho Counterpart Internasionál liu husi Programa advokasia nian halo peskiza kona-ba armonizasaun idade koñesimentu iha Timor Leste.
Advokasia JSMP José Moniz informa, ohin fahe informasaun kona-ba sira nia servisu advokasia iha Tribunal, Parlamentu Nasional no fahe rezultadu peskiza ne’ebé sira halo iha tinan kotuk no peskiza ne’e sei iha kontinuasaun liga ho asuntu idade konsentementu ka idade menór.
José afirma, Rezultadu ne’ebé sira aprezenta ona no Municipio ne’ebé mak targetu ba peskiza mak hanesan Ermera no Dili nia rezultadu sira fahe ona ba konstante sira
No mós fahe Informasaun ba sira nia parseiru hanesan Organizasaun ema ho defisiénsia, estudante no Autoridade lokál sira atu bele iha koñesimentu kona-ba saida mak sira apela liga ho servisu advokasia kontribui pás ba idade menór.
“Ami nia rekomendasaun ba labarik sira ne’ebé mak vítima ba violasaun ruma tenke iha korajen atu la bele nonook bainhira akontese tenke ko’alia ho família atu bele hetan asisténsia lori kazu ne’e ba halo keixa ba instituisaun relevante sira atu bele hetan justisa no lia loos ne’ebé mak lalais,” Dehan José ba jornalista iha Edifisiu Raes Hadomi Timor Oan (RHTO), Kuarta 08/2/2023.
Iha sira nia rezultadu monitorizasaun iha kazu envolve labarik ne’ebé sai vítima nia númeru aas iha Timor-Leste
“ita haree Iha tinan kotuk kazu abuzu sexual ka violasaun hasoru labarik ne’e nia númeru aas iha 24 kazus ba labarik sira,” Nia Informa
Iha fatin hanesan Reprezentante Asosiasaun Halibur Defisiensia Matan Timor-Leste (AHDMTL) Cárceres Nunes Arca Tura afirma, nia hanesan parseiru organizasaun sosiedade sivíl ida ne’ebé luta mós ba iha komunidade vulneravel liuliu ba iha ema ho defisiénsia
“Hanesan joven ida sente haksolok no orgullu tebes ho servisu JSMP nia ba iha peskiza ida ne’e tanba, ida ne’e referénsia boot ida mai ami atu bele ajuda liu tan iha terenu, liuliu liga ba iha koñesimentu feto no labarik feto sira nia, tanba AHDMTL luta mós ba iha kontra violénsia hasoru feto no labarik feto, inklui feto ho defisiénsia,” Dehan nia
Nia haktuir oinsá mak atu redús violénsia liuliu ba iha asedu sexual ne’ebé mak hasoru labarik feto ho idade minoridade sira ne’e Organizasaun sosiedade sivíl ne’ebé mak servisu kona ba fo protesaun no asisténsia ba komunidade liuliu ba ema vulneravel atu mellora liu tan nune’e bele redús violénsia asedu sexual
“Entauntaun ho peskiza JSMP nian interesante loos mai ami bele ajuda liu tan ami hodi hasa’e ami nia advokasia ami nia sosializasaun ba iha komunidade oinsá bele intende di’ak liu tan kona ba oinsá mak atu bele prevene no redús ba violénsia hasoru feto no labarik feto iha sosiedade no komunidade,” Nia informa
Entretantu durante ne’e JSMP hala’o peskiza iha Munisipiu Ermera no Dili ohin fahe esperiénsia servisu relasiona ho servisu advokasia no mós fahe rezultadu peskiza ne’ebé JSMP hala’o ona iha Munisipiu rua hanesan Dili no Ermera iha relasaun ho idade koñesimentu ba sira nia parseiru hanesan Organizasaun ema ho Defisiensia Komunidade LGBTI, Xefe Suku sira, Polisia Suku (OPS) no mós Estudante husi Universitáriu sira.
Jornalista : Esperança Monteiro Soares
Editor : Orlando Magno
