(Dili) Mudansa – La fasil ba ema ida atu sai xefe ba família uma laran maibé la’ós mós difisil atu lidera uma laran maski todan nu’udar aman ida prontu buka meius oioin hodi sustenta nesesidade uma laran.
Moris kriatura maromak nia, ema ida-idak diferensiál moris loroloron balu moris di’ak no ema balu moris iha terus no susar nia laran maibé esforsu an nafatin atu ahi matan dapur nian la bele mate iha loron no kalan.
Situasaun ne’e akontese ba Henrique de Araujo nu’udar xefe ba família uma laran, nia prontu atu responsabilidade ba nesesidade uma laran Liu husi halibur Lata aat, besi aat tanba lakohi dependente ba ema seluk inklui família sira.
Henrique de Araujo orijen husi aldeia Hatulara suku Malibu postu administrativu Maliana munisipiu Bobonaro agora hela iha Palpasu sidade Dili.
Henrique informa, nia parte buka moris liu husi buka lata aat hodi faan fali ba ema seluk tanba hanesan ema kaben na’in tenke responsabilidade ba uma kain rasik, se lakohi atu responsabilidade entaun se loos mak atu tau ba feen no oan sira.
“Ha’u harii ona uma kain iha oan mane ida enatun ha’u tenke buka meius oinsa atu responde netik ami nia nesesidade uma laran, se ita nu’udar kaben na’in mak ita dependente nafatin ba inan aman no família sira ne’e ita moe ka lae?” dehan Henrique ba média Mudansa iha Muzeu oin Dili, tersa 07/02/2023.
Henrique Moris depende de’it ba lata aat, besi aat, kaleen aat no seluk tan, maski hetan osan la barak maibé nia hadomi tebes knaar ida ne’e tanba husi hirak ne’e mak nia responde nesesidade uma laran.
“Dala ruma ha’u buka lata aat mak la hetan entaun tenke sosa fali ema seluk nia, kilo ida sentavus 50 no ami ba tetu fali iha Palpasu kilo ida sentavus 60 entaun ami manán de’it sentavu 10, se ami hetan lata barak entaun loron ida bele hetan $.5 ou $.6,” nia deklara.
Moris ona tenke buka moris atu moris ba loron aban nian, hodi hatudu an ba ema seluk la bele taka realidade moris ba ema seluk tanba kriatura maromak nia ema hotu sempre iha moris di’ak no moris iha susar nia laran.
“Hala’o servisu ida ne’e, maski hetan osan natoon maibé iha benefísiu ba ha’u-nia moris tanba liu husi servisu ida ne’e ha’u bele sustenta nesesidade uma laran, hanesan sosa foos, mina ekipamentu uma laran no mós sosa buat ne’ebé ami presiza,” nia deklara”.
Antes atu hakotu nia lian, Henrique hato’o nia rekomendasaun hodi husu ba joven sira labele moe atu buka moris iha atividade saida de’it, tanba buat hotu iha prosesu nia laran, esforsu an mak loron ida sei sai ema ne’ebé susesu, tanba ne’e hapara konflitu fó liman ba malu kaer metin unidade hodi kontribui ba dezenvolvimentu iha rai doben Timor-Leste.
Estajiadu MD : Zemidonio Martins
Editór : Orlando Magno
