(Dili) Mudansa – Diretór Ezekutivu Konsellu Imprensa (KI) Rigoberto Monteiro informa, konselleiru Otelio Ote mak eleitu nu’udar prezidente KI definitivu ba tinan 2023 to’o 2025. liu husi eleisaun internál hili malu elezivel segredu tuir estatutu Konsellu Imprensa artigu 23.
Iha semana kotuk Eis Prezidente KI Virgilio Guterres rezigna an ba iha fatin seluk tanba Lei fó dalan ba Konsellu Imprensa iha fulan 3 hodi reorganiza membru foun atu hili mós prezidente definitiva no plenáriu presta Ordinariu ne’ebé prezensa husi membru na’in 5 inklui membru Eleitu Amito de Araujo ne’ebé elezivel husi konferénsia Asosiasaun Jornalista Timor Lorosa’e (AJTL) iha loron 27 fulan Janeriu tinan ne’e.
“Prezidente definitivu ba períodu 2023-2025 restante mandatu ba tinan 2021 to’o 2025, pesoál ne’ebé mak liu husi eleisaun Internal sira na’in 5 hili segredu tuir estatutu Konsellu Imprensa iha artigu 23 hili malu elezivel konselleiru Otelio Ote mak hanesan prezidente Konsellu Imprensa (CI) definitivu ba tinan 2023-2025.” Dehan Diretor Ezekutivu KI, Rigoberto Monteiro ba jornalista liu husi konferénsia Imprensa iha sala Auditorium KI Kintak Boot Dili,Tersa, 07/02/2022.
Tanba, Prosesu eleisaun Internal ne’e fasilita husi sekretáriu Konsellu Imprensa reprezenta husi Diretor Ezekutivu entaun hamutuk ema na’in 6 mak iha laran.
“Parabens susesu di’ak ba Prezidente Otelio Ote pesoa ida ne’ebé jornalista seniór, ha’u hanoin ho Prezidente foun nia lidera Konsellu Imprensa bele la’o ba oin no ha’u husu ba média sira kontinua koopera ho Konsellu Imprensa no prezensa prezidente foun nian,” Diretor Ezekutivu CI subliña.
Nia esplika, estatutu hateten prosesu eleisaun Internal liu husi plenária sira na’in 5 mak hili malu tuir prosesu Eleisaun Konsellu Imprensa, Sekretariu Konsellu Imprensa tuir estatutu KI laiha kandidatu laiha nomeasaun, maibé sira na’in 5 elizivel iha direitu ba vota no iha direitu ba ema vota no liu husi votasaun Otelio Ote maka eleitu ba Prezidente KI.
“Iha estatutu Konsellu Imprensa la hakerek Prezidente KI, maibé kritéria ba nomeasaun membru KI hakerek tiha ona ema mai husi parlamentu hakerek ona, ema mai husi Jornalista ka média hakerek ona kritéria ba sira na’in 5 ne’ebé mai bele eleitu ba Prezidente tanba elezivel hotu,” Nia akresenta.
Diretór Ezekutivu Rigoberto afirma, tuir estatutu Konsellu Imprensa Artigu 23 KI sei haruka naran Prezidente Eleitu hamutuk ho naran membru Eleitu Otelio Ote ho Amito Araujo ba parlamentu Nasional (PN) iha loron 5 nian laran.
“Signifika aban ka bainrua Konsellu Imprensa sei haruka naran ba Parlamentu Nasional (PN) atu Prezidente Parlamentu Nasional (PPN) fo Posse ba membru definitivu no prezidente Konsellu Imprensa definitiva,” Nia hateten.
Iha fatin hanesan Eleitu prezidente KI Otelio Ote argumenta, hanesan hotu-hotu rona rasik husi Diretor Ezekutivu anúnsiu ona rezultadu Prezidente Konsellu Imprensa restu mandatu ba períodu 2023-2025.
“Husi rezultadu ne’ebé anúnsiu ha’u ata rasik mak eleitu ba Prezidente Konsellu imprensa tinan 2, ha’u la’os foun ba imi hotu, agradese ba imi ne’ebé halo kobertura ba loron ida ohin,” Otelio Ote Haktuir.
Nia dehan, Hanesan prezidente Eleitu sei halo tuir komprimisiu luta kontra hodi atinji Liberdadde Imprensa no Liberdade Espresaun, oinsá hametin relasaun di’ak iha terenu liu husi kode étika.
Halo kooperasaun di’ak iha rai laran espera kontinua hanesan baibain, durante tinan 2 nia laran sei defende misaun sira ne’ebé KI iha no halo mudansa ba performa profisaun Jornalista no mós performens kualidade publikasaun média iha Timor
“Hau sei koko halo konsolidasaun Internal iha KI no sei buka atu hatene buat barak iha Diretor Ezekutivu KI ho nia ekipa tomak atu konsolida Instituisaun Media sira, oinsá ha’u bele hatene kondisaun performe média sira nian atu ita bele hatene média sira iha ona kapasidade natoon ezekuta nia servisu loron-loron hatudu nia performe iha públiku.” Otelio akresenta.
Nia relata, kona ba informasaun hoax ida ne’e tenke servisu hamutuk hodi prevene hoax importante imi (Jornalista) intende média konvensionál tanba imi la’os média sosiál.
“Ita média konvensionál iha regra rasik no iha konde étika jornalista kumpre la’o tuir, KI sempre halo monitorizasaun publikasaun média hotu-hotu hanesan média imprime, rádiu, jornál,Televisaun ita iha kapasidade ladún barak, maibé koko akompaña konten sira hanesan ne’e. Prezidente Eleitu realsa.
Ote hatutan, média ida-idak ho nia ekipa tomak tenke hatene integra an ba konde étika Jornalista ne’ebé iha ona, atu média hotu kontrola nia produsaun notísia liu husi prosesu redasaun ida ne’ebé normál tanba KI uza nia baze legál rasik planu anuál tinan 5 nian, iha tiha ona oinsá maka adapta an iha lei KOMSOS no Estatutu KI tuir planu ne’ebé iha.
“Ita presiza haburas tan KI la’o ba oin, ne’e maka armonia partisipasaun husi Jornalista, Editor no Media na’in sira hotu iha planu ne’ebé Konsellu Imprensa trasa tiha ona, imi nian partisipasaun maka KI mós iha espetativa bele dezenvolve ho di’ak ida ne’e mak ita presiza hadi’a,” Nia Hakotu
Jornalista : Delfina Borges
Editor : Orlando Magno
