(Dili) Mudansa – Ministru Asuntus Parlamentares Komunikasaun Sosiál (MAPKomS), Francisco Martins da Costa Pereira Jeronimo informa, Komunidade sira iha direitu atu hetan informasaun tanba ne’e Governu tenke fahe informasaun lolos ba Komunidade sira kona ba situasaun rai laran.
MAPKomS hato’o asuntu ne’e bainhira hala’o sorumutu ho Prezidente Autoridade Munisipiu Ermera Eusébio Salsinha hodi ko’alia kona-ba sensitivu ho informasaun ba Komunidade sira iha Palasiu Governu, Kinta 09/02/2023.
Ministru Asuntus Parlamemtares Komunikasaun Sosial Fransisco Martins afirma, ohin PAM Ermera mai ko’alia kona ba oinsá bele sensibiliza Komunidade liu husi informasaun sira ne’ebé klaru ou loos.
“Ita-nia Komunidade ka sidadaun hotu-hotu iha direitu atu hetan informasaun loloos mai husi ita-nia na’i-ulun sira liuliu mai husi Governu tenke fó informasaun barak no lolos ba Komunidade atu nune’e sira mós hatene tuir lala’ok iha ita-nia nasaun laran,” Jeronimo relata.
Governante ne’e haktuir, iha komisaun garante buat tolu importante, mak hanesan Liberdade Imprensa, Liberdade Espresaun iha mós direitu de informasaun.
“Ita iha hanoin atu lansa deziminasaun informasaun nasionál ne’ebé atu loke iha Ermera tuir mai iha parte hotu-hotu bele fo informasaun ba ita-nia Komunidade ho loloso,” Nia salienta
Enkuantu programa lansa deziminasaun informasaun nasionál ne’e sei hala’o iha Marsu ou Abril tanba sira tenke halo preparasaun tékniku sira enkuantu Primeiru Ministru mós konkorda ona kona ba lansamentu ne’e.
Ministru ne’e argumenta, atu halo sensibilizasaun ba Komunidade sira hodi kombate disinformsaun relasiona ho Eleisaun Parlamentar tanba agora kampaña eleitorál besik ona, Tenke halo sensibilizasaun ba komunidade sira atu kombate disinformsaun.
“Ita hakarak atu halo susesu ita-nia eleisaun Parlamentar ne’ebé sei akontese iha fulan sira tuir mai, husu ba komunidade sira la bele konsumu Informasaun Hoax maibé presiza informasaun loos nune’e sira ba partisipa Eleisaun parlamentár ho livre no avontade la presiza iha presaun ba sira,” Nia esplika
Iha fatin hanesan Prezidente Autoridade Munisipiu Ermera Eusébio Salsinha esplika, ohin hasoru malu MAPKOMS hodi ko’alia kona-ba sensibilizasaun informasaun ne’ebé loos iha sosiedade atu sira la bele konsumu informasaun Hoax ka falsu.
“Atividade sira ne’e iha relasaun ho komunikasaun sosiál sensibilizasaun ba públiku liuliu iha área kobertura nian, oinsá ita-nia komunidade sira asesu no hetan informasaun ne’ebé loloos atu nune’e sira labele konsumu lia hoax ka rumores maibé tenke forma sensibilizasaun ida ne’e importante tebes,” Eusébio rekomenda.
Entretantu enkontru preleminar ne’e atu avalia kondisoens hotu hodi hare oportunidade ida oinsá atu halo lansamentu ba atividades komunikasaun sosiál iha Munisipiu Ermera ne’ebé sei realiza iha tempu badak.
Jornalista : Esperança Monteiro Soares
Editór : Orlando Magno
