(Dili) Mudansa – Terus todan, kmaan no fasil ne’e eziste nanis ona iha mundu nia hahalok tan ne’e kriatura maromak nian hein hala’o de’it tuir buat ne’ebé maromak kria tiha ona.
hanesan mós negosiante ida ne’ebé brani moris mesak, liu husi atividade negósiu ki’ik ne’ebé ema barak labele halo no la vale mós iha ema barak nia matan maibé rezultadu boot tebes tanba husi negósiu ki’ik bele harii ona mahon (uma) ida hodi hela permanente iha sidade Dili kapitál Timor-Leste.
La fasil ba ema hotu atu harii uma ida iha sidade Dili hodi hela no buka ai-han ba moris loron ida nian, maibé realidade akontese ba joven mane ida halo negósiu to’o harii uma iha Tasi tolu, tanba mane klosan ne’e brani hasoru terus ho susar iha situasaun no tempu saida de’it ho intensaun hakarak inan aman no família atu kontente la’os oin buis iha ema wain nia leet.
Situasaun realidade ne’e reflete ba negosiante Domingos Pereira ne’ebé iha inisiativa fa’an sigarru, pulsa no bee ákua tan nia sente iha benefísiu / vantajen boot tanba husi rezultadu negósiu Domingos halo ona uma ida hodi hela.
“Hau iha hanoin Ida ne’ebé lakohi atu sadere beibeik ba ina aman no família sira, tanba ha’u iha inisiativa hakarak buka rasik osan hodi goza ha’u-nia kosar been, ha’u sosa uma ida ne’ebé dadaun ha’u hela ba, ida ne’e osan mai husi ha’u-nia kosar-been rasik,” dehan Negosiante Domingos ba Mediamudansa iha areadores Merkadu-Lama 09/12/2022.
Nia haktuir, Domingos hahú fa’an sigarru iha tinan 2013 no hetan suporta husi inan aman, hahú ho osan montante $.50, mak sosa sigarru no pulsa hodi fa’an fila fali to’o agora mós ha’u sei fa’an.
“Hau hahú halo negosia ne’e kleur ona, uluk Hau Sei kós, maibé Agora Lae ona, uluk Hau hala’o negósiu ki’ik hanesan, fa’an Sigaru, pulsa no bee, rezultadu husi negósiu ne’e ha’u halo ona uma ida iha tasi tolu, no hetan mós ajudu uitoan husi biin rasik,” Nia haktuir.
Nia rekomenda, nu’udar foin-sa’e Labele moe atu hahú ho negósiu ki’ik, maibé tenke iha hanoin hodi halo buat ruma ba família Sira no hatudu mentál hasoru situasaun ne’ebé difisil no fasil, maibé labele hanoin uluk buat boot.
Entretantu negosiante Domingos Pereira iha maun alin Hamutuk na’in Tolu (3), Domingos oan ba daruak iha sira nia uma laran, dadaun ne’e Domingos hala’o nia estudu iha Universidade Dili (UNDIL), Fakuldade Siensia da Saude Departametu Saude Publik, orijen Husi aldeia Uatuliloli suku Uani-uma postu Administrativu Uatu-Carabau Munisipiu Viqueque.
Estajiadu : Zemidonio Martins
Editór : Orlando Magno
