(Dili) Mudansa – Timor oan hotu-hotu presiza tau responsavel ba nia an atu rekupera ekonomia Timor-Leste ne’ebé dadaun ne’e moras todan hela ou iha hela sala ICU.
Reitór Universidade da Paz (UNPAZ), Adolmando Amaral informa, Ekonomia iha nasaun Timor Leste daudaun ne’e moras todan hela atu rezolve dezenvolvimentu ekonomia ida ne’e labele husu de’it ba governu no estadu maibé presiza ema hotu nia responsabilidade hodi bele asegura dezenvolvimentu ida ne’e bele la’o ba oin
Reitór Adolmando Amaral konta, kresimentu ekonomia tinan rua ba kotuk nia pozisaun negativu 8.3 depois governu aprova orsamentu estadu husi 2.8 depois Tinan tuir mai tan Sae ba 3.6 no mai iha tinan ida ne’e mak sa’e ba 3.26.
Espera katak husi orsamentu jerál estadu ne’ebé mak hetan ona aprovasaun no iha tinan 2022 promulga barak bele rekupera ekonomia ida ne’ebé agora daudaun moras todan hela ne’e
“Ita-nia ekonomia agora daudaun moras todan hela, atu rekupera moras ida ne’e la’ós responsabilidade governu no estadu nia de’it maibé ita hotu nia responsabilidade atu rekupera ekonomia no asegura dezenvolvimentu,”dehan reitór UNPAZ Adolmando ba Jornalista sira iha Salaun Jose Casimiro UNPAZ Osindo 3 tersa 13/12/2022
Reitór Adolmando Amaral hatutan orsamentu ne’ebé mak aprova ne’e la’ós ema ida mak atu jere maibé tenke mai ho ideia inovativu ho kreativu rasik atu bele halo netik buat ruma hodi halo dezenvolvimentu ba rai doben Timor.
“Ita boot sira ne’ebé lisensiadu iha área ekonomia, bankária kontabilidade, jestaun orsamentu ne’ebé aprova la’os atu jere maibé ho ita-nia ideia inovativu rasik atu kontribui ba rai ida ne’e Ikus mai bele rezulta povu nia moris di’ak tantu husi rai ulun rai klaran to’o ,rai ikun ne’ebé halerik hela ba dezenvolvimentu,”Katak nia
Reitór ne’e akresenta, finalista judisiária sira sai ema ekonomista labele hanoin de’it buat di’ak ba nia an, maibé bolu mós ema seluk bele Mai hamutuk atu bele halo dezenvolvimentu ba rai ida ne’e no labele hanoin de’it servisu maibé investe ba atividade negósiu sira.
“Iha situasaun ida ne’e bele rezolve iha Tinan rua mai, tanba ita-nia setór privadu sira seidauk komprende sira nia estatutu lolos emprezáriu Sira lakohi sai investór nasionál entaun ita sira ne’ebé estuda ekonomia bele kontribui ba ekonomia iha rai laran,” Reitór Adolmando hakotu.
Jornalista : Domingas Viana
Editór : Orlando Magno
