(Dili) Mudansa – Negosiante ambolante Sigaru no Pulsa, Frederico da Silva Guterres ho idade 25 nu’udar estudante ida iha Universidade Dili (UNDIL), hahú buka rasik osan hodi sustenta ninia nesesidade tanba lakohi dependénsia beibeik ba família sira ho razaun aban-bainrua harii uma kain ema seluk sei la responsavel ba nesesidade uma laran.
Frederico informa, nia parte durante ne’e dependénsia loos ba inan aman maibé mosu ideia ida iha nia hanoin atu Evita dependénsia mak tenke esforsu an nune’e to’o ikus harii uma kain ulun la moras ona atu buka osan tanba hatene nanis ona oinsá atu hetan osan.
“Hau hala’o negósiu ne’e Iha fulan kotuk loron 9/11/2022 entaun loron 9 agora ha’u fa’an fulan Ida, buat ne’ebé motiva ha’u mak, la’os atu buka riku maibé atu sustenta ba ha’u Nia an no família sira, depende hela de’it ba família sira ne’e di’ak maibé futuru harii uma kain ita ulun moras di’ak liu hahú agora aprende buka osan, dehan Frederico ba Mediamudansa iha Merkado Lama Dili, kuarta, 7/12/2022.
Frederico deklara, Iha momentu ne’ebá nia husu osan ba inan-aman hodi sosa sigarru no pulsa fa’an fali fali iha sidade laran.
“Osan bemo nian mós Ita nafatin husu no garantia nafatin ba inan aman, di’ak liu husu osan hodi Hala’o fali negósiu ki’ik oan Sira hanesan ne’e atu Ita evita garantia Tan ona ba família sira iha foho liuliu inan aman,” nia konta.
Frederico afirma, maski negósiu ki’ik maibé Frederico Senti benefísiu boot ba nia an tanba bele atende ninia nesesidade liuliu ba estudu nian hanesan fotokopi matéria ne’ebé presiza fotokopi.
“Osan sira ne’e, ha’u uza selu bemo no eskola inklui selu koos no mós uza ba ha’u-nia presiza sira ne’ebé ha’u uza iha momentu estudu nian, dadaun ne’e ha’u eskola iha Universidade Dili (UNDIL), foti Fakuldade Direitu,” Nia deklara.
Frederico haktuir, Osan ne’ebé inan aman fó ba nia hamutuk $. 60, hodi sosa tabaku L.A, Marlboro no tabaku Suria hirak ne’e hotu osan totál $. 49,50, tanba folin la hanesan.
“Ba maluk foin-sa’e sira ne’ebé daudaun ne’e kontinua hela estudu, iha Dili laran, tenke iha prinsípiu ida ne’ebé mak mesak, labele depende liu ba inan aman no família sira, maibé tenke buka maneira ne’ebé atu suporta ita nian an,” nia rekomenda
Frederico iha maun alin Uma laran Hamutuk na’in lima (5) kompostu husi feto na’in Tolu (3) Mane na’in Rua (2) Frederico oan ba datoluk. no mós Frederico da Silva Guterres orijen husi Aldeia Uatuliloli suku Uani-uma Postu Aministrativo Uatu-karabau Munisipiu Viqueque.
Estajiadu MD : Zimidonio Martins
Editór :Orlando Magno
