Grupu KBTHAT Hili Lixu, “Halibur” Osan

banner 120x600

(Dili) Mudansa – Klibur Bada’en Tradsionál Homan Ale-ale Timor (KBTHAT) mai ho ninia karakter rasik katak, hili lixu halibur osan la sateia governu tanba ida-idak iha rasik hanoin kreativu oinsá bele transforma lixu sai ba osan.

Klibur Bada’en Tradsionál Homan Ale-ale Timor (KBTHAT) hanesan grupu ida ne’ebé lokaliza iha Delta 04 no harii iha tinan 2014 husi ema na’in ruanulu maibé dadaun ne’e hela na’in ualu mak ativu iha grupu ne’e tanba sira seluk okupadu ho servisu balun.

Koordenadór Design ba produtu KBTHAT Luis da Silva Amaral informa, durante loron haat nia ho ekipa tuir feira iha ne’ebé organiza husi Centru Nasional Chega (CNC) hodi fa’an sira nia produtu ne’ebé transforma ale-ale nia fatin sai pasta.

“Produtu hirak ne’e la’ós mai husi Tali tahan no boro tahan maibé ne’e husi lixu husi gelas ale-ale transforma ba filafali hodi reinventa sai fali produsaun modernu mak ami fa’an fali hodi hetan osan tanba Timor oan barak inklui malae (estranjeiru) sira sosa ami nia produtu,” dehan Koordenador Luis ba MediaMudansa iha CNC Balide Dili. Sexta, 09/12/2022.

Koordenadór Design ba produtu KBTHAT Luis da Silva Amaral. imajen MediaMudansa

Nia haktuir, durante tuir feira loron haat, Primeiru fa’an iha fundasaun Alola no mós iha CNC durante loron rua tanba haree meza balu mamuk hela entaun sira prienxe hodi fa’an sira nia produtu.

“Malae no Timor oan sira Haree husi dook de’it mós gosta entaun sasán ne’e bele fó benefísiu maski fo’er maibé bele fó moris ba ema bainhira fó moris ba ema tenke iha ideia hodi transforma lixu sira ne’e bele sai ba ekonomia familiár, tanba durante loron haat ne’e ami hetan osan maizumenus $.200.00 resin,” nia deklara.

Nia esplika, prosesu prodús sasán ne’e durasaun naruk tanba Primeiru tenke halibur gelass Ale-ale no balu sosa husi ema depois koá hotu fase, hili kór sira ne’ebé hanesan tau hamutuk hafoin junta hamutuk sai produtu úniku tuir ita-nia komprensaun.

“Joven sira tenke iha hanoin ne’ebé di’ak no kreativu ita la bele garantia diploma sira ne’e lori ba sateia iha governu maibé iha rikusoin barak atu ita bele halo, Entaun Foinsa’e sira tenke iha ideia ne’ebé di’ak atu bele kria buat ne’ebé ema soe ka lixu sira ne’e transforma ba sasán ne’ebé bele iha folin,” nia afirma.

Luis dehan, Buat ne’ebé mak sira hakarak halo la’ós ema seluk mak Obriga maibé mai husi sira nia fuan atu bele hetan osan di’ak liu buka rasik osan duke laran metin ba ema seluk.

“Produtu ne’e maski simples maibé ami halo ona esportasaun ki’ik ba iha Singapura, liu husi kompañia ida iha Bebonuk sosa iha ami lori ba fa’an iha Singapura tanba ne’e ba futuru ami hakarak produtu ne’e sai modernu liu tan, tanba agora ami halo ona vestidu no Jaket rompi maski difisil maibé ami hakarak ami nia produtu ne’e sai moderniza,” Luis relata.

Aleinde ne’e, sira mós tuir ona kompetisaun iha UNDP liu husi Knua Joventude fila liman konsege hetan Terseiru Lugar maski Grupu 30 mak kompete iha momentu ne’ebá.

“Ami ba halo lobi ministériu balu nune’e bele hetan suporta ruma, lori produtu fó ba sira atu bele sai hanesan rekordasaun maibé sira la suporta,” nia hakotu

Jornalista : Ekipa Media Mudansa

Editor        : Orlando Magno

banner 325x300