(Dili), Mudansa – Prezidente Repúblika, José Ramos-Horta informa, relasaun bilaterál entre Korea Sul no Timor-Leste di’ak no metin bele aposta ba kooperasaun ekonómika iha rai laran.
Xefe Estadu, José Ramos-Horta hato’o lia hirak ne’e bainhira partisipa iha komemorasaun loron nasionál Korea nian no mós tinan 20 relasaun diplomátika entre Timor-Leste no Coreia do Sul, iha ne’ebé, serimonia nee hala’o iha Otél Timor Kolmera Dili, Kuarta, 09/11/2022.
“Relasaun entre rai rua, Timor-Leste ho Korea metin loos, ha’u espera governu no povu iha Korea mós kontente ba relasaun ho Timor, espera katak, relasaun ne’e sei aumenta, ba oin ita bele buka atu sira bele loke fábrika ruma iha ne’e hodi kontribui ba Timor nia dezenvolvimentu no ba empregu iha rai laran,” hateten Prezidente Ramos-Horta.
Horta haktuir, relasaun bilaterál entre nasaun rua sei solida, tanba Timor-Leste no Korea iha istória ne’ebé hanesan no sofre invazaun oioin, maibé interesadu loos atu apoia Timor-Leste.
“Ha’u fiar, tanba ohin kalan mós ema kompañia boot mós mai, primeiru kompañia boot iha Korea mak mai, ha’u iha esperansa ké sei aumenta liután relasaun ho Korea-do-súl, ita-nia joven sira mós kontente estuda língua Koreanu, ha’u espera ké sei bele kontinua ba Korea ba futuru, tanba povu Korea haree istória Timor nian hanesan sira-nian,” katak PR Horta.
Entretantu, hola parte iha serimónia refere, membru governu, korpus diplomátikus no mós Kargus Xefia husi liña ministériu, prezidente husi ajénsia autónomas sira, reprezentante husi autoridade defeza no seguransa no seluk tan.
Jornalista : Domingas Viana
Editór :Orlando Magno
