(Dili), Mudansa – Polísia Nasionál Timor-Leste (PNTL) sei halo atuasaun bainhira Funsiónariu Públiku (FP) utiliza patrimóniu estadu iha loron finadu, apelu mós ba Motórista transporte públiku labele tula Pasajeirus liu kapasidade Kareta nian.
Portavós PNTL, Superintendente Xefi Arnaldo de Araujo informa, funsionáriu ne’ebé utiliza patrimóniu estadu husu atu labele uza ho família sira hodi halo atividade iha munisípiu tanba governu hasai ona Dekrétu oioin kona-ba utilizasaun de Tranporte.
“Funsiónariu sira ne’ebé utiliza karreta estadu labele uza iha loron feriadu no iha finadu karik funsionáriu sira uza, polísia sei halo atuasaun ba karreta ne’e, hapara iha komandu depois entrega fali ba fatin ne’ebé designadu ona,” Dehan Portavós PNTL Arnaldo ba jornalista liu husi konferénsia imprensa iha Komandu Jerál PNTL Kaikoli Dili, Kuarta, 26/10/2022.
Portavós Arnaldo afirma, Komandu Jeral tau ona atensaun ba karreta na’in sira no ba motorista liuliu bus sira atu la bele tula pasajeirus liu karreta nia kapasidade dala ruma pasajeirus ne’ebé tuur iha karreta leten mak hetan dezastre, balu monu tun no karreta bele baku fila.
“Komandu fó hatene ona ba karreta na’in sira atu fó hanoin ba sira nia motorista nune’e labele tula pasajeirus liu kapasidade karreta nian, se sira tula liu kapasidade karreta nia komandu sei fó multa tuir asaun ne’ebé sira komete liu regras tránzitu nian,” Arnaldo deklara.
Portavós PNTL Arnaldo haktuir, husu ba komunidade sira la bele hemu tua iha loron finadu nune’e labele afeta ba situasaun seguransa nia iha territóriu laran tomak.
“Kona-ba seguransa Finandu nian ha’u hanoin Komandante Jeral sei fó orientasaun ba komandante munisípiu sira hotu, atu asegura ita-nia komunidade ne’ebé halo viajen husi Dili ba Foho no husi foho ba sira nia suku nune’e sira nia atividade bele la’o ho di’ak”,Tenik nia.
Aleinde ne’e, Portavós PNTL, Superintendente Xefi Arnaldo de Araujo apelu ba Komunidade tomak atu kuidadu an iha loron finadu, bainhira ba tau Ai-funan iha munisípiu viajen ho kalma nune’e buat hotu la’o di’ak.
Jornalista :Ekipa mediaMudansa
Editór : Orlando Magno
