(Dili) Mudansa – Polísia Nasionál Timor-Leste (PNTL), mantein ho karta notifikasaun ne’ebé hato’o ona ba jornál Independente, tan ne’e Portavós PNTL, Superintendente Xefi Arnaldo de Araújo husu Jornalista ho Xefi redasaun atu kumpre notifikasaun ne’e.
Maski Lei Komunikasaun Sósial iha hela atu kondena jornalista sira bainhira hakerek ladún loos, maibé PNTL nafatin mantein ho karta notifikasaun ne’ebé uza lei kódigu prosesu penál númeru 53 hodi hein jornalista nia prezensa atu klarifika títulu notísia ne’ebé antes ne’e públika ona iha jornál Independente.
Portavós PNTL Superintendente Xefi Arnaldo de Araújo informa, Komandante Jerál PNTL Komisáriu Faustino Da Costa horiseik, 25/10/2022 bolu ona jornalista independente akompaña husi portavós PNTL hodi ko’alia kona-ba, notifikasaun ne’e hanesan baibain atu fó de’it klarifikasaun hodi hatene, la’os atu halo kriminalizasaun.
“Kona-ba mantein nafatin karta notifikasaun ida ne’e, husu ba sidadaun hotu-hotu atu mai kumpre hodi fortifika ou klarifika de’it tuir Notifikasaun ne’ebé fó ona ba Jornalista Independente,” dehan Portavós PNTL Arnaldo ba jornalista liu husi Komferensia Imprensa iha Komando Jerál PNTL Kaikoli Dili, Kuarta 26/10/2022.
Porta Vós Arnaldo haktuir, sira (PNTL), hein jornalista atu kumpre, nune’e bele fó ona informasaun atu notifikasaun ne’e bele remata ona.
“Bolu jornalista mai atu fortifika de’it informasaun saida mak Jornalista hakerek iha títulu Jornál nian, dala ida tan la’os atu kriminaliza, tan ne’e husu ba Jornalista sira atu mai kumpre notifikasaun ne’e hodi fó informasaun de’it hotu ona,” Arnaldo deklara.
Nia esplika, la’ós atu kriminaliza jornalista maibé husu jornalista atu fortifika de’it informasaun, katak informasaun ne’e sai duni husi ema importante fó informasaun ne’e, la’os atu kriminaliza maibé atu klarifika hodi haree asuntu ne’e ho di’ak
“Horseik Komandante Jerál mós, husu ba Jornalista sira ho laran luak atu mai Fortifika de’it informasaun la’os mai atu kriminaliza ita boot sira (jornalista) lae,” Nia relata.
Porta Vós ne’e afirma, sira (parte investigasaun), mós iha regras rasik entaun sira bele notifika ema enkuantu sira nia xefe ba fatin seluk Vise bele asina maibé la bele uza karimbu tanba momentu ne’ebá Komandante Investigasaun delega nia vise mak asina surat ida ne’e kona-ba karimbu, komandante mak bele utiliza.
“Ha’u hanoin iha xamada dé notifikasaun ne’e sira (jornál Independente) mós tau iha data atu mai fó deklarasaun no testemuña, agora fila fali ba Jornalista nia étika hodi fó de’it nia deklarasaun tuir buat ne’ebé mak horiseik Komandante Jerál ko’alia ona ba Jornalista,” Arnaldo afirma.
Nia realsa, Karta ne’ebé hato’o husi konsellu imprensa no mós Asosiasaun Jornalista sira dadaun ne’e sei iha hela Komandante Jerál Komisáriu Faustino Da Costa nia meza leten.
Jornalista : Ekipa mediaMudansa
Editór : Orlando Magno
