MEJD Presiza “Loke Matan” Ba Kondisaun Eskola EBC Bulu

banner 120x600

(Kovalima) Mudansa – Diretór Eskola Ensinu Baziku Sentral (EBC) Bulu, postu Administrativu Zumalai Munisipiu Kovalima, José da Silva husu ba Ministeriu Edukasaun Juventude Desportu (MEJD), atu tau matan hodi atende emerjénsia ba eskola EBC Bulu ne’ebé dadaun ne’e kondisaun aat hela.

Plafon dodok ne’ebé sei eziste iha Eskola EBC Bulu.

“Eskola 3° siklu nia fatin agora la aguenta ona tanba Ha’u rasik haree ho matan eskola ne’e piku monu no plafon sira mós uut hotu ona entaun tempu udan estudante sira la bele tuir prosesu aprendizajen, tanba ne’e husu ba MEJD atu atende lalais tanba estudante sira besik ona ezame nasionál,” dehan Diretór EBC Bulu José da Silva ba Media Mudansa Via telefone, Sexta 14/10/2022.

José haktuir, Iha eskola EBC 1° no 2° siklu sei di’ak uitoan maibé ida ba 3° siklu hanesan 7°,8° no 9° ano fatin ba estuda la Dignu “merese” ona ba estudante sira atu aprende iha aula laran.

“Se MEJD la rezolve preokupasaun ne’e entaun udan mai aat liu tan ona, tanba iha foho bainhira udan sempre akompaña ho anin boot ida nee bele fó risku ba estudante no profesór/a sira nia vida bainhira hala’o prosesu aprendizajen,” José relata.

Nia rekomendasaun, Fatin ne’e la seguru ona ba estudante sira tan ne’e nia rekomenda ba MEJD liuliu ba ekipa ka diresaun ne’ebé kontrola kona-ba eskola, tun diretamente haree rasik ho matan atu fuan bele sente lolos, labele haree de’it informasaun husi média sosiál.

“Impaktu husi fatin ne’e aat nanis ona foin lalais Akontesimentu ida akontese bainhira Profesor Antonio dos Santos hanorin hela Estudante sira mak derrepente de’it plafon ida monu tanba plafon mós komesa dodok ba daudauk ona.,” José deklara.

Diretór ne’e Sujere, fó hanoin ba estudante EBC Bulu husi 1° to 9° ano atu korajen nafatin hodi kontinua prosesu aprendizajen,

Tuir dadus ne’ebé média Mudansa.info asesu totál estudante iha EBC terseiru siklu hamutuk na’in 117 kompostu husi sétimo ano 41, Oitavo ano 38 no mós nonu Ano hamutuk na’in 38, nune’e mós totál Profesór/á iha EBC Bulu hamutuk 21 kompostu husi Profesór permanente na’in 8, Kontratadu na’in 5 no mós voluntáriu 8.

Jornalista : Ekipa MD

Editór        : Orlando Magno

banner 325x300