(Dili) Mudansa – Médiku espesialista na’in-tolu hosi kompañia Biocentis husi Imperial College United Kingdom, hala’o enkontru ho Prezidente Repúblika, José Ramos-Horta, iha ne’ebé manifesta prontidaun atu apoiu ministériu saúde hodi kombate moras denge iha Timor-Leste.
Chief Executive Officer kompañia Biocentis, Giorgio Rocca informa, objetivu hasoru malu ho Xefe Estadu ne’e, atu ko’alia kona-ba apoiu ne’ebé sira hakarak atu fó bá governu.
Giorgio esplika, Profissionál saúde hirak ne’e sei hasoru malu ho ministériu saúde no reprezentante Organizasaun Mundiál Saúde (OMS), hodi diskute inisiativa ida ne’e.
“Depois de enkontru sira sei haree uluk lai ita-nia governu nia kapasidade, atu ita bele atende moras denge ne’ebé dadaun ne’e sirkula hela iha Rai laran,” dehan Chief Executive Officer kompañia Biocentis, Giorgio ba jornalista iha Palásiu Prezidensiál Nicolau Lobato, Dili, Tersa 4/9/2022.
Giorgio esplika, sira-nia ekipa sei diskute no rona de’it husi parseiru WHO, Kruz Vermella ne’ebé durante ne’e ajuda governu halo atendimentu ba kombate denge iha Timor.
Iha Sorin seluk, Head of Strategy, Federico Guelpa argumenta, sientista husi kompañia Biocentis, husi Reinu Unidu, hakarak atu utiliza sira-nia ekipamentu modernu ne’ebé bele redús “mosquito ” liuliu “aedes aegypti” ne’ebé bele hamosu denge.
“Ami mai atu introdús ba señór Prezidente, depois sei ba hasoru Ministériu Saúde, posibilidade sira bele haruka ami kolleita dadus hosi ita-nia governu depois mak ami bele uza ami-nia teknolojia,” Federico deklara.
Entretantu, Xefe Estadu, José Ramos-Horta mós husu médiku Biocentis sira atu servisu hamutuk ho ministériu saúde no OMS atu implementa teknolojia foun hosi kompañia Biocentis ne’e hodi kontribui ba redusaun moras denge iha Timor-Leste.
Jornalista : Ekipa MD
Editór : Orlando Magno