(Dili), Mudansa – Komandante Jerál Polisia Nasionál Timor-Leste (PNTL), Komisariuu Faustino da Costa, nia parte seidauk bele ko’alia kona-ba kazu joven tara an iha sela detensaun Komandu PNTL Dili, tanba sei iha hela prosesu investigasaun nia laran.
“Ha’u seidauk ko’alia buat ruma, relasaun motivu hosi kazu tara ne’e no mós atu demite Komadante PNTL Munisipiu Dili nia kargu, tanba kazu ne’e sei iha hela prosesu investigasaun nia laran, tanba ne’e ha’u seidauk bele ko’alia buat ruma,” Komandante Jerál PNTL, Komisariu Faustino da Costa, afirma ba jornalista sira iha Kuartel Jerál PNTL Caicoli, Sesta, 02/09/2022.
Komandante Jerál PNTL, Komisariu Faustino informa, dadaun parte Komandu Jerál PNTL forma ona ekipa hodi halo investigasaun kle’an ba kazu joven tara an iha sela detensaun Komandu PNTL Dili.
“ita prepara ona ekipa no ha’u mós halo ona despaisu hodi ekipa ne’e atu halo sira nia serbisu iha tempu badak nia laran, atu investiga no buka motivu husi kazu joven tara an iha sela detensaun Komandu PNTL Dili,” Komandante Jerál Komisariu esplika.
Faustino relata, membru sira ne’ebé envolve iha ekipa investigasaun mai hosi membru Komandu Jerál PNTL maibé la envolve membru Komandu PNTL Munisipiu Dili.
“Ita-nia ekipa ne’e, hamutuk ema na’in lima kompostu husi membru Komandu Jerál PNTL,” Komisariuu PNTL Faustino akresenta.
Iha sorin seluk, Komadante PNTL Munisipiu Dili, Superientidwnte Xefe Polisia Henrique da Costa afirma, nia lakohi fó komentáriu kona-ba motivu hosi akontesimentu kazu joven tara an iha sela detensaun Komandu PNTL Dili, Tanba Komandante Jerál PNTL delega ona ba iha Komadu Jerál PNTL maka atu halo investigasaun.
“ Ha’u labele ko’alia buat ida tanba kazu ne’e Komandante Jerál delega ona ba iha Komadu Jerál PNTL maka atu halo investigasaun,” informa Komadante PNTL Munisipiu Dili.
Jornalista : Ekipa MD
Editór :Orlando Magno
