(Dili),Mudansa – Xefe Grupu Tais Hadadi, Elda Ferreia de Oliveira informa, nia sente kontente bainhira hetan konvida husi Ministeriu Turismu Komersiu Industri (MTKI), atu fa’an produtu artezenatu iha eventu feira ida ne’e maibé Elda sente triste tanba Komisaun Organizador (KO), la monta Ahi eletrisidade iha sira nia fatin.
“Ami sente triste tebes tanba MTCI konvida ami mai depois la prepara ahi eletrisidade mai ami atu ami fa’an sasán maski sira fó hatene ona ami atu ami ida-idak lori lampu (ampolas) maibé realidade hatudu fiu ida de’it mós la iha atu ami tau lampu hodi haroman ami nia fatin,” dehan Elda ba jornalista iha Kristu Rei Dili, Sexta (12/08/2022).
Elda afirma, nia hasoru komisaun Organizador no husu ba sira hatán, fiu listrik iha ona dalan atu monta ba imi-nia fatin maibé to’o tuku 08 resin mós la mosu mai entaun vendedór iha nakukun hanesan ne’e ema labele mai sosa ami nia sasán.
“Ami fa’an de’it iha nakukun hanesan ne’e se mak atu sosa ami nia produtu, ha’u sente triste tanba komisaun organizadór la prepara másimu ho orsamentu ne’ebé iha, ami nia presiza maka prepara fatin hodi monta lampu maibé ami la presiza osan ne’ebé governu aloka ona ba eventu ne’e,” Elda relata.
Nia sujere, husu ba parte relevante atu hadi’a erru ida ne’e, atu vendedór sira fa’an produtu iha ne’e maibé tenke prepara kondisaun ba vendedór sira ho di’ak liuliu kona-ba ahi tanba kalan hanesan ne’e presiza naroman atu ema haree no sosa produtu ne’ebé grupu artezenatu sira fa’an.
Iha Sorin Seluk, husi Grupu Balabeira Maubara, Maria Eugelia argumenta, komisaun organizadór nia preparasaun ba sira la másimu tanba sira haruka vendedór sosa tiha lampu maibé KO la dada fiu ba sira nia fatin atu tau lampu maski grupu hirak ne’e hetan konvida husi MTCI.
“Iha tuku tolu lokraik ami husu ba komisaun katak oinsá ho ahi eletrisidade ne’ebé seidauk monta iha ami nia fatin entaun sira hatán tuku 06 mak monta maibé realidade agora tuku 8 mós sira la monta maibé ha’u garantia bainhira ami fa’an iha naroman ema sosa ami nia produtu,” Maria deklara
Maria esplika, kona-ba hariis fatin MTKI dehan ba Vendedor sira atu uza de’it maibé realidade hatudu bainhira atu asesu hariis fatin tenke selu osan sentavus 25 mak foin bele tama hariis fatin soe bee.
“Agora ami nia sasán la folin tanba fa’an de’it iha nakukun laran, tan ne’e husu ba komisaun organizadór sira atu monta ami ahi eletrisidade iha ami nia fatin no rezolve mós hariis fatin ba ami atu ami bele asesu se komisaun organizadór hanesan ne’e de’it ami sei la tuir tan feira ki’ik sira hanesan ne’e,” Maria relata.
Hatán ba preokupasaun ne’e, Diretor Jeral Turismu, MTCI Jelino Soares esplika, Vendedores sira nia preokupasaun kona-ba eletrisidade katak, horiseik husi komisaun organizadór fó hatene ona ba partisipante sira ne’ebé atu mai fa’an sira nia produtu iha ne’e.
“Ami nafatin servisu hamutuk ho komisaun organizadór sira atu loron aban fasilita sira di’ak liu maibé lolos ita-nia vendedór sira ohin dadeer tuku 10 sira mai haree fatin atu nune’e parte komisaun bele halo instalasaun ahi ba sira maibé sira mai iha tuku 05 lokraik ida ne’e mak sai impedimentu ba sira nia atividade iha feira ne’e,” DJ Joselino Rekonese.
Joselino haktuir, MTCI fó ona konvite ba vendedór(a) barak maibé finalmente balu la partisipa dala ruma iha hela failasung tanba kona-ba prienxe kritéria atu partisipa iha eventu ne’e MTKI fó hatene hotu ona ba vendedór sira.
Jornalista :Orlando Magno
Editór : Felisberto F. da Costa
