(Dili) Mudansa — Portavós negosiante merkadu Taibesi Juvita Da Costa Pereira informa, nia parte sente preokupa bainhira Jestaun Merkadu duni negosiante, maibé la prepara fatin bá vendedores, oinsá atu rai sira nia sasán hodi fa’an.
“Jestaun Merkadu mai duni vendedór sira, difikuldade mak ne’e, hotu-hotu bele tama bá laran maibé balun fatin la iha, tanba governu seidauk fó fatin ida ne’e mak ita preokupa,” dehan portavós Juvita bá jornalista média mudansa.info, iha merkadu Taibesi Dili, Kuarta 24/08/2022.
Juvita relata, sira ne’ebé fatin la iha ne’e bá laran atu tau iha ne’ebé, negosiante sira mai husi munisípiu sira koopera malu kona-ba fatin sira iha merkadu laran, maibé depende ba fatin ne’ebé mak ema abandona karik mak fatin la iha entaun pasiénsia.
“Governu Seidauk prepara fatin bá vendedór(a) sira iha li’ur, maibé jestaun merkadu sira mai duni ona ita sente ladún di’ak tanba ema mós hakarak buka moris, agora ema hotu-hotu buka moris liu husi fa’an sasán, oinsá sira bele hetan netik osan hodi sustenta sira nia uma laran” Portavos Juvita haktuir
Nia esplika, negosiante sira preokupa maka fatin, konsidera mós vendedór(a) labele hatene de’it mak duni duni vendedór sira, tanba fatin la iha maka sira mai tuur hanesan ne’e se governu prepara fatin ba negosiante sira karik situasaun sei la hanesan ne’e.
Juvita sujere, jestaun merkadu sira se bele ko’alia didi’ak lai, labele mai foti no estraga fali negosiante sira nia sasán, merkadu ne’e nasionál atu koloka oinsá maka sai di’ak ne’e, jestaun merkadu sira maka hatene
“Merkadu nasionál ema kompradór hotu-hotu hakarak tama mai sosa modo iha ne’e, governu hakarak merkadu ne’e sai di’ak tenke kria fatin , no tau negosiante sira iha fatin dignu liuliu ba hirak ne’ebé seidauk iha fatin atu rai sasán hodi buka moris” nia hatete.
Portavós ne’e afirma, Sira ne’ebé fa’an iha li’ur kuaze na’in 30 resin, hanesan joven sira foti tutan modo hodi fa’an fali hetan dolar 1 ou 2 ne’e lubuk ida, sira mós hakarak buka moris maibé jestaun merkadu mai duni de’it sira, maski governu la prepara fatin bá negosiante sira,
“governu seidauk prepara fatin ho másimu bá negosiante sira, ne’ebé labele mai duni arbiru de’it” Juvita lamenta.
Hatan ba preokupasaun ne’e, koordenadór jestaun merkadu Taibesi, Antonio Manuel de Araujo esplika,vendedór preokupa fa’an iha laran la folin, tenke mai iha li’ur maibé hakarak ka lakohi tenke fa’an iha merkadu laran, ema sosa ka lae? tenke hakmatek iha fatin ne’ebé maka estadu pronúnsia ona.
“Vendedores sira ne’e foin hahú kreatividade mai halo negósiu iha tinan ida nia laran entaun ida ne’e maka ita la iha prepara fatin sira tan ita koloka bá iha uma laran no koloka sira iha ninin,” Antonio argumenta
Antonio akresenta, jestaun merkadu foin daudauk halo mudansa boot, iha jullu to’o agostu, liu husi muda vendedór(a) ne’ebé fa’an sasán runguranga.
“Iha área merkadu Taibesi, jestaun merkadu hamutuk ho patrollamentu seguransa PNTL haree vendedór ne’ebé fa’an sasán iha li’ur, ha’u hateten ita boot sira fa’an sasán iha fatin labele fa’an runguranga mai iha terminál no estrada ne’ebé atu asesu bá merkadu,” Antonia realsa.
Nia deklara, Negosiante sira lori fali sasán mai iha fatin ne’ebé governu bandu, entaun jestaun merkadu foti medidas hodi muda nafatin sira se vendedór(a) la koopera tenke prende sasán ne’ebé sira fa’an tanba tuir lei aliña 3 hateten muda obrigatóriu, iha fatin ne’ebé bandu.
Nia hatutan, ema hotu-hotu tenke fó jestaun bá malu, karreta motór ema la’o ain mai sosa sasán, tenke tun bá fatin ne’ebé maka determina para ema bele bá asesu livre, labele halo impedimentu ba karreta ho motór nia dalan.
“Hau husu bá vendedór(a) hotu, tenke iha konsiénsia, atu ita bele koopera malu ho parte estadu, no jestaun merkadu nune’e labele preokupasaun entre ita,” nia reforsa.
Antonio tenik, ida ne’ebé lori sasán mai husi munisípiu halo transferénsia bá malu hanesan parseiru maibé bainhira sira nia parseiru la foti entaun aguenta fa’an maibé labele fa’an iha fatin ne’ebé bandu ona.
Jornalista : Azelio da Cruz
Editór : Orlando Magno
