(Dili), Mudansa– Governu liuhosi Ministeriu Turismu Komersiu Industria prioritiza no fó apoiu finanseiru ba Timoroan ne’ebé servisu iha rai liu no fila mai ho idea negosiu ne’ebé di’ak.
Atu hetan apoiu ne’e iha dalan rau ne’ebé governu oferese, dalan dahuluk mak trabaladór sira ne’e bele tuir kompetisaun negosiu inovativu ne’ebé governu oferese iha munisipiu ne’ebé sira hela ba.
“Segundu governu apoiu sira ho kreditu suave ne’ebé ho funan kiik ho pursetu tolu durante tinan ida liuhosi Banku BNCTL,” dehan Vice-Ministru Komérsiu no Indústria, Domingos Lopes Antunes ba Jornalista Média Mudansa hafoin halo abertura ba formasaun inisiál ba manan nain kompetisaun negosiu inovativu dahuluk no daruak, iha SIN Matadoru Dili, Segunda (22/08/2022)
Governu rekoñese katak Timoroan servisu iha rai liu ne’ebé fila ona mai, konserteja aprende buat barak. Iha idea barak mak provoka sira nia hanoin liuhosi saida mak sira halo no saida mak sira haree iha ema nia rai bele sai oportunidade atu implementa iha Timor.
Sujere ba Grupu Seasonal Worker hosi Australia ne’ebé fila tiha ona bele asesu, sira ne’ebé ba servisu iha uniaun Europea hanesan UK ne’ebé fila ona mai, bele asesu no sira ne’ebé ba rai Korea bele asesu.
“Sira hirak ne’e bele hola parte iha kompetisaun negosiu inovativu, bele hola parte iha kreditu suave no bele hola parte iha formasaun hirak ne’ebé MCTI ho UNDP oferese.
Hosi dalan ida ne’e, governu la’ós taka dalan ba sira atu labele fila fali ba servisu maibé sira bele emprega ema ruma hodi tau matan hela ba sira nia negosiu, sira bele ba maibé karik sira hakarak hela metin hodi kontinua nogosiu ne’e, ne’e di’ak liu tan.
Iha sorin seluk vise Ministru mós enkoraza ba maluk joven sira ne’ebé ho defisiante ne’ebé iha kapasidade bele halo negosiu bele asesu mós ba oportunidade hirak ne’ebé mensiona iha leten tanba ne’e programa inkluzaun.
Jornalista : Felisberto F. da Costa
Editór : Orlando Magno
