(Dili), Mudansa – Ekipa servisu sekreta kaptura joven ida iha área Tasi-Tolu, ho naran inisiál, VR, tinan 22 husi Cotalara, Suku Loidahar, Munisipiu Likisa ne’ebé envolve iha kazu na’ok motór, Bibi no osan iha munisípiu ne’ebé la hanesan.
Ekipa sekreta halo vijilánsia durante oras haat nia laran, kaptura suspeitu VR iha área Tasi Tolu, oras tuku 9 kalan, hamutuk ho evidénsia komprovativu hanesan osan ho montante $580 USD no motór marka Vixion Raider kór verde, xapa matríkula O.7296, ne’ebé nia na’ok iha Beloi-Viqueque.
Iha suspeitu nia deklarasaun katak, horiseik nia na’ok osan hamutuk $.900.00 ho motór ida iha área Beloi, Suku Carau Balo, Postu Viqueque, Munisipiu Viqueque no ohin halai mai Dili. maibé osan hirak ne’e suspeitu gasta ona $.320.00 no restu $.580.00, nune’e mós iha tinan 2009, VR na’ok mós komunidade nia animál (bibi) hamutuk 13 iha Munisipiu Likisa.
Ekipa Servisu lori ona suspeitu VR ba edifísiu SIPN Kaikoli hodi foti deklarasaun no kontaktu ona ba Servisu Investigasaun Kriminal Komandu Munisipiu Viqueque hodi entrega suspeitu VR.
Komandu Operasaun PNTL hatuun ona diretiva ba Komandante SIP hodi intensifika buka tuir autór sira seluk ne’ebé envolve ho kazu hanesan.
Ekipa Servisu sekreta ne’e, kompostu husi, Servisu Informasaun Polisia Nasionál (SIPN), lidera operasaun hamutuk ho Unidade Falintil no Servisu Nasional Intelijensia (SNI), hodi buka tuir autór sira ne’ebe komete krime públiku.
Jornalista : Ekipa MD
Editór : Orlando Magno