(Dili), Mudansa – Ministra Negósiu Estranjeiru no Kooperasaun (MNEK), Adalgisa Magno informa, nia parte sente kontente bainhira rona informasaun ida katak, tempu besik East Timor Development Agency (ETDA), sei haruka timor oan na’in 100 ba servisu iha brunei.
Ministra Adalgisa Hatoo asuntu ne’e, bainhira nia ho embaixadór Brunei halo vizita ba ETDA atu koñese liu tan kona-ba saida mak durante ne’e ETDA hala’o.
“Hau kontente tebetebes bainhira rona informasaun ne’e, tanba ida ne’e sai hanesan informasaun di’ak bele promove liu Tan saida mak ETDA halo ba nasaun sira seluk nune’e bele haruka tan Timor oan, ba servisu iha rai liu tanba ema barak iha rai laran buka hela servisu,” dehan Minístra MNEK Adalgisa ba jornalista iha ETDA Fatuhada Dili, kinta (11/08/2022).
Adalgisa relata, Se traballadór sira servisu di’ak no hanesan ezemplu ne’ebé di’ak iha Brunei, entaun kontinua haruka traballadór sira ba servisu iha ne’ebá (Brunei).
“Ajencia Brunei nia Ida dehan, iha fulan ne’e, atu mai foti timor oan ne’ebé selesionadu ona atu ba servisu iha Brunei no mós sei selu Aviaun, ” Adalgisa esplika.
Iha fatin hanesan, Diretór ETDA Januário M. Neto Mok, haktuir Objektivo MNEK ho embaixadór Brunei halo Vizita ida atu haree prosesu atividade hotu ligadu ho kooperasaun ne’ebé ETDA halo Ho ajénsia liuliu kona-ba rekrutamentu hodi haruka Timor Oan ba servisu iha Brunei.
“Sira mai vizita atu haree ETDA ninia preparasaun haruka joven Timor oan sira ba servisu iha Brunei, maibé Agora iha hela faze entrevista nia laran ami prepara graduadus sira barak liu mak Hospitalidade ,Iha Area Kulinaria no Area koá na’an ,” Diretór ETDA Januário deklara.
Januario argumenta, loron 29 fulan Agusto tinan ne’e, aviaun Chater Fline husi Brunei mai atu tula timor oan na’in 100 ne’ebé mak selesionadu atu ba Servisu iha nasaun Brunei tanba tuir asina kontratu ho kompañia, sei hahú servisu iha inísiu fulan setembru 2022.
Jornalista :Domingas Viana
Editór : Orlando Magno
