(Dili), Mudansa – Institutu Defeza Nasionál (IDN), halo lansamentu dahuluk kursu Mestradu ba Forsas Armada, Polisia no ema ne’ebé servisu iha estadu hamutuk nain 30, kona-ba seguransa nasionál nian oinsá bele uza forsa no ameasa ba rai ka nasaun ruma.
Diretór Institutu Defeza Nasionál, Comodoro Professor Doutor Donaciano Costa Gomes “Pedro Klamar Fuik” informa kursu ba primeiro edisaun hetan kandidatu ne’ebé mak mai husi setores hotu-hotu hamutuk 60 maibé agora na’in 30 mak tuir formasaun.
“Ha’u seidauk haree lista finál kandidatu nian tanba juri sira sei eskolla hamutuk entre kandidatuas neen nulu (60) ne’e, tolu nulu (30) mak sei partisipa kursu ba agora i sira seluk sei partisipa iha segunda edisaun,” dehan Comodoro Pedro Klamar Fuik ba Jornalista iha Quartel Jerál F-FDTL Fatuhada Dili, kinta (21/07/22).
Enkuantu primeiru lansamentu ne’e nu’udar primeiro síkulu konferénsias anuais ne’ebé IDN halo kada tinan relasiona ho tema importante iha mundu, no mós iha Timor-Leste.
“Ita iha nasoens barak soberanu, sira ida-idak iha forsa interese, oinsá mak forsa ho interese ne’ebé bele utiliza amesas iha kontestu relasoens internasionais,” dehan Comodoro Pedro Klamar Fuik.
Ne’e duni IDN konvida professor espesialista ida, nu’udar eix Prezidente Defeza Portugal Azeredo Lopes hodi partilla nia matenek no esperiensia liu-liu nia matenek akadémika sobre hanoin hirak ne’e hotu.
“Ba ita Timor, importante hatene problema mundu nian, ne’ebé iha Europa, hanesan funu entre Ukraina ho Russia, problemas iha médiu oriente, akontese iha Azia, Taiwan, Xina, problema ne’e besik liu ita, entaun ita presiza hatene,” nia Hakotu.
Jornalista : Juvita dos Santos
Editór : Orlando Magno
