(Díli) Palasiu Prezidente, 09/06/2026,-Eis Prezidenti da República Indonesia, Megawati Soekarnoputri, hamonu matan been bainhira hato’o nia diskursu hafoin simu kondekorasaun Grande Colar Ordem Timor-Leste, husi Presidente da Repúblika de Timor-Leste (PR-RDTL) José Ramos-Horta iha Palásiu Prezidensiál,Ai-tarak laran, Díl, kondekorasaun ne’e hanesan kontribuisaun extraordináriu ba Timor-Leste, povu timoroan, no umanidade
Iha nia diskursu, Megawati hato’o agradese ba onra ne’ebé nia simu no dehan,kondekorasaun ne’e la’ós marka konkluzaun husi viajen naruk relasaun entre Indonesia no Timor-Leste, maibé sai hanesan inísiu husi responsabilidade foun ida atu hametin liu tan amizade no kooperasaun entre nasaun rua ne’e.
“Hau simu onra ida ne’e la’ós hanesan konkluzaun husi istória ida ka sinal katak ita nia knaar kompletu ona. Hau simu hanesan inísiu ida ne’ebé reprezenta mandatu ba futuru no kompromisu ida atu kontinua servisu hamutuk,”Hatete Eis PR-RI Megawati iha diskuru ho matawen, Díli, 09/07/2026
Nia mos subliña katak, Grande Colar Ordem Timor-Leste la’ós medalha deit, maibé simbolu ida husi lasu amizade ne’ebé tenke kontinua husi jerasaun ida ba jerasaun seluk. Tuir nia, relasaun entre Indonesia no Timor-Leste hanesan korrente ida ne’ebé metin no la bele kotu, tanba bazeia ba respeitu, amizade no kolaborasaun.
Megawati observa katak onra ne’e la’ós ba nia rasik ka ba nia jerasaun deit, maibé ba joven sira husi nasaun rua ne’ebé sei lori ba oin amizade no relasaun di’ak ne’ebé harii husi lider sira antes.
Iha nia diskursu, Megawati hanoin fila-fali nia esperiénsia bainhira sai Prezidenti husi Indonesian Democratic Party of Struggle (PDI-P). Nia relata katak iha tempu ne’ebá nia fó bolsa estudu ba labarik barak husi Timor-Leste ne’ebé la iha oportunidade atu kontinua sira nia edukasaun.
Nia konta katak, bolseiru ida husi Timor-Leste mai hasoru nia no aprezenta an hanesan “mama nia oan” ida ne’ebé hetan tulun husi programa ne’ebá. Agora daudaun ema ne’ebá serve ona nu’udar embaixadór Timor-Leste iha Kamboja.
Iha fatih hanesan,Prezidente da República Democrática de Timor-Leste(PR-RDTL) José Ramos-Horta, afirma kondekorasaun ne’ebé fó ba Megawati atu rekonhese nia lideransa no kontribuisaun importante ba transformasaun demokrátika Indonesia no mos ba abertura relasaun foun entre Timor-Leste no Indonesia.
Ramos-Horta hatete katak bainhira Megawati asume kargu Prezidenti Indonesia iha tinan 2001, nia hili atu simu realidade foun Timor-Leste nu’udar Estadu independente.
“Governu kolabora ho Nasoens Unidas (UN)durante períodu tranzisaun, apoia normalizasaun relasaun diplomátika, hametin kooperasaun fronteira no haburas diálogu polítiku ne’ebé sai fundasaun ba relasaun bilateral to’o ohin loron” Hatutan PR, iha palacio Prezidente
Prezidenti Timor-Leste subliña,amizade entre Timor-Leste no Indonesia la moris husi haluha pasadu, maibé husi korajen atu hasoru istória ho laran luak no hakarak harii futuru ida ne’ebé dame.
Nia mos fó omenajen ba lider sira husi nasaun rua, inklui Megawati Soekarnoputri no Kay Rala Xanana Gusmão, tanba sira nia vizaun ba rekonsiliasaun ne’ebé transforma relasaun bilateral sai ezemplu ida ba dame no amizade iha rejiaun.
“Lori Estadu no povu Timor-Leste nia naran, hau entrega Grande Colar Ordem Timor-Leste ba Ibu Megawati Soekarnoputri hanesan simbolu respeitu ba nia korajen polítiku, lideransa matenek no vizaun ba futuru,” Hatutan PR Ramos-Horta.
Enkuantu Grande Colar Ordem Timor-Leste mak kondekorasaun sivíl aas liu iha Timor-Leste, estabelese tuir Dekretu-Lei Nú. 20/2009. Ondra ida ne’e fó ba xefe Estadu sira no figura nasional ka internasionál ne’ebé fó kontribuisaun esepsionál ba dame, amizade, umanidade no dezenvolvimentu relasaun ho Timor-Leste.
Jornalista : Osterlia Muni
Editor :Ana Maria
