(Díli), Kampus UNTL,12/06/2026 – Estudante Universidade Nasional Timor Lorosa’e (sigla-UNTL), husi Fakuldade Siênsias Sosiais no Polítika, Departamentu Dezenvolvimentu Komunitáriu Turnu 24 realiza Semináriu Nasionál ho tema “Demokrasia Polítika ba Ekonomia Solidáriu Kooperativa iha Timor-Leste.”
Objetivu prinsipal husi atividade ne’e mak atu hasa’e kapasidade estudante sira iha área ekonomia, liuliu oinsá atu integra setor agrikultura atu bele kontribui ba bem-estar povu nian ho forma ne’ebé sustentável no adekuadu liu iha Timor-Leste.
Tuir komisaun organizadóra ba seminariu ne’e Lorensu Fernandes Pereira hatete katak atividade ne’e importante tebes tanba bele sai hanesan matadalan ida hodi dezenvolve setor agrikultura no ekonomia sustentável iha Timor-Leste. Nia hatete atividade ne’e hetan apoiu husi dosente sira durante semana rua nia laran to’o remata.
“Semináriu ida ne’e mos atu reflekte Loron Mundial Kooperativa, atu fó konsiénsia ba ita hotu katak kooperativa la’ós de’it liafuan, maibé presiza komprende kle’an no implementa iha pratika,” dehan Komisaun Organizadora Lorensu ba jornalista Média Mudansa iha Kampus UNTL,Sexta,12/06/2026.
Iha parte seluk orador prinsipal Armindo M. Maia Amaral salienta,semináriu ne’e iha importánsia bo’ot tanba promove setor agrikultura iha sistema ekonomia ne’ebé bele lori ba dezenvolvimentu justu iha sosiedade.
Nia mos hateten,ekonomia la bele lao mesak, maibé presiza apoiu husi sistema direitu no polítika. Tan ne’e, nia husu ba estadu, liuliu Parlamento Nasional (PN) Timor-Leste, atu halo lei sira ne’ebé bele garante moris di’ak ba povu, liuliu iha área kooperativa sira.
“Se la iha lei ne’ebé forte, ita bele sai de’it hanesan observadór iha ita nia rai rasik,” hateten nia.
Entretantu Semináriu ne’e hetan partisipasaun maximu husi estudante área Dezenvolvimentu Komunitáriu UNTL,enkuantu semináriu ne’e organiza atu marka no reflekte Loron Mundial Kooperativa, no envolve oradór prinsipal sira hanesan Dótor Armindo M. Maia Amaral no Elsa Juaquina, ne’ebé partilha hanoin no esperiénsia kona-ba estratéjia atu hametin no dezenvolve ekonomia sustentável iha futuru.
Jornalista/Estajiada :Caryn Camões
Editor :Ana Mari
