(Díli), Jardim 5 de Maiu , 08 Maiu 2026 – Uniaun Estudantil Laclubar (UEL) kondena ho lian maka’as ba desizaun hosi autoridade transporte iha Munisípiu Manatuto ne’ebé limita operasaun transporte públiku hosi Laclubar ba Díli, enkuantu área seluk hanesan Natarbora, Soibada no Laclo kontinua hetan autorizasaun operasaun normal.
Iha komunikadu imprensa porta Voz UEL, Jeronimo Soares, konsidera katak, asaun ne’e la’os deit desizaun administrativu, maibé forma diskriminasaun institusional ne’ebé viola prinsipiu igualdade no justisa tuir Konstituisaun Republika Demokratika de Timor-Leste.
“Durante fulan tolu ikus ne’e, operadór transporte hosi Laclubar obrigadu para operasaun, hamosu difikuldade boot ba komunidade, inklui estudante sira ne’ebé depende ba transporte atu asesu ba edukasaun, saúde no atividade ekonomia iha kapital”, dehan porta Voz UEL Jeronimo Soares iha Jardim 5 de Maiu, 08/05/2026.
Porta Voz mós hatutan tan katak, organizasaun ne’e akúza Direção Nacional de Transportes Terrestres (DNTT) no Direção Municipal de Transportes e Comunicações (DMTC) uza lei ho “padraun rua”, tamba implementasaun la aplika ba área hotu-hotu ho igualdade.
UEL mós konsidera argumentu legal ne’ebé hato’o hosi Diretor DNTT iha Munisípiu Manatuto la iha kredibilidade, tanba autorizasaun transporte kontinua fó ba diresaun seluk.
“Lei uza hanesan eskusa, la’os hanesan guia justisa,” nia akresenta.
Tuir UEL, situasaun ida ne’e hatudu falta lideransa hosi autoridade relevante sira no bele hamosu krize sosial se la rezolve lalais. Organizasaun ne’e afirma katak juventude no estudante sira mak sai vitima direta hosi desizaun refere.
“UEL ezije Governu no autoridade transporte atu, Revoga imediatamente limitasaun transporte hosi Laclubar mai Díli, Implementa lei ho padraun ida de’it, ho justisa no transparénsia; Responsabiliza autoridade ne’ebé foti desizaun ne’e; Kria solusaun konkretu ba problema transporte; Investe iha infraestrutura transporte ne’ebé dignu ba povu”. Nia akresenta.
UEL mós aviza katak se problema ne’e kontinua la rezolve, estudante no komunidade Laclubar sei mobiliza protesta demokratiku atu husu justisa no igualdade.
Aleinde ne’e, organizasaun refere planeia atu hato’o kazu ida ne’e ba Parlamentu Nasional no mós ba Primeiru Ministru Timor-Leste atu husu intervensaun direta.
“Ami hakarak hateten katak justisa la bele negosia no igualdade la bele selektivu,” nia hakotu.
Jornalista/ Estajiaria : Ana Maria da Silva/ Caryn Camõens
Editór : Francisco Pereira
