(Díli), Palasio Presidente, 4 Maiu 2026 – Nomeasaun ba edisaun datoluk Prémiu Empreendedora Feto Timor-Leste ofisialmente loke ona, objetivu atu fó onra ba empreza no lider negósiu sira ne’ebé lidera husi feto pionera iha nasaun. No Associação Empresarial das Mulheres de Timor-Leste enkoraja feto empreendedora sira iha nasaun tomak atu partisipa, hodi hatudu sira-nia kapasidade no kontribui liu tan ba dezenvolvimentu ekonomia inkluzivu iha Timor-Leste.
Inisiativa ida ne’e organiza husi International Finance Corporation (sigla-IFC) no Associação Empresarial das Mulheres de Timor-Leste (sigla-AEMTL), ho patrosíniu husi José Ramos-Horta. Programa ne’e mós implementa ho parseria ho Banco Central de Timor-Leste no hetan apoiu husi governu Australia no New Zealand.
Prezidente Repúblika, José Ramos-Horta, hatete katak progresu Timor-Leste depende ba partisipasaun igual husi povu tomak, inklui feto sira ne’ebé kontribui diretamente ba ekonomia liuhusi kriasaun negósiu, inovasaun no empregu.
“Feto Timoroan sira iha papél sentral iha dezenvolvimentu nasaun. Sira-nia istória merese atu fó-sai no rekoñese,” dehan Prezidente Repúblika José Ramos-Horta, iha salau palasio president, 04/05/2026.
Tuir Prezidente AEMTL, Hergui Luina Fernandes Alves, akresenta katak, eventu tinan kotuk liu ba simu liu hosi 100 nomeasaun, no vensedór sira hetan benefísiu hanesan vizibilidade boot, kresimentu profisionál no expansaun negósiu.
“Tinan ida ne’e, prémiu kontinua selebra kontribuisaun empreendedora feto sira iha setor oioin, husi agrikultura to’o finansas no ospitalidade,” dehan Prezidente AEMTL, Hergui
Prezidente AEMTL, hatete katak prémiu ne’e sai plataforma importante atu inspira mudansa no promove unidade iha setór privadu.
“Bainhira feto sira harii negósiu, sira la’ós deit kria rendimentu, maibé mos forma futuru ekonomia nasaun,” nia dehan.
Husi sorin seluk, reprezentante IFC, Christina Ongoma, subliña katak maske feto sira hatudu determinasaun aas iha negósiu, barak sei hasoru dezafiu iha asesu ba finansiamentu no informasaun.
“Prémiu ne’e ajuda loke oportunidade ba rede, koñesimentu no kapital, atu bele suporta kresimentu empreza sira ne’ebé lidera husi feto,” nia hatete.
Dadus husi World Bank Group hatudu katak feto sira lidera liu hosi metade empreza mikro, ki’ik no médium (MSME) iha Timor-Leste, ne’ebé sai motor importante ba kresimentu ekonomia inkluzivu.
Ba edisaun 2026, organizadór sira prepara kategoria lima ho prémiuhamutuk sanulu, ne’ebé sei rekoñese lideransa, inovasaun no kontribuisaun iha inkluzaun finanseira.
Nomeasaun loke to’o 8 Jullu 2026, no aberta ba individu, instituisaun no empreza hotu-hotu iha Timor-Leste. Kandidatu sira presiza submete deskrisaun klaru kona-ba sira-nia susesu no impaktu.
Organizadór sira enkoraja feto empreendedora hotu-hotu atu partisipa, atu bele hatudu sira-nia kapasidade no kontribui liu tan ba dezenvolvimentu nasaun.
Jornalista/ estajiaria : Bety, Sandra, Dina
Editor : Francisco Pereira
