Díli, Colmera, 13/05/2026 – Fundo de Desenvolvimento do Capital Humano (sigla-FDCH) kontinua demonstra nia kompromisu atu investe iha futuru ba juventude Timor-Leste liu husi oportunidade bolsa estudu ba estudante sira iha rai-laran no mos rai-liur. Inisiativa ida ne’e ho objetivu atu prepara rekursu umanu ne’ebé matenek no kualifikadu hodi kontribui ba dezenvolvimentu nasaun nian.
Diretór Ezekutivu FDCH, Julio Apariçio, hatete katak FDCH iha papel importante tebes atu responde ba nesesidade no dezafiu sira iha sosiedade, liu-liu iha área edukasaun no dezenvolvimentu rekursu umanu.
“FDCH importante tebes tamba iha vizaun ida atu ajuda responde ba nesesidade no dezafiu sira iha sosiedade liu husi promosaun direitus umanus, justisa no apoiu ba komunidade sira, liu-liu estudante sira ne’ebé hakarak kontinua estudu,” hatete Julio Apariçio ba jornalista estajiária DMTT iha sala vizita FDCH, kinta-feira (07/05/26).
Diretór Ezekutivu akresenta tan katak, FDCH la’o nafatin hodi prepara no dezenvolve rekursu umanu ne’ebé bele fortalese estadu no nasaun iha área hotu-hotu. To’o agora, liu ona estudante bolseiru 7.000 ne’ebé remata estudu husi nível Diploma III to’o Doutoramentu.
“Kada tinan ami kontinua hili estudante sira ne’ebé iha kapasidade no valor aas atu kontinua estudu iha rai-liur,” nia dehan.
Julio mós revela katak estudante sira ne’ebé hetan oportunidade atu estuda iha rai-liur, bainhira remata estudu sei fila fali mai Timor-Leste hodi kontribui ho koñesimentu no abilidade espesiál ne’ebé sira aprende ona.
“Ami hakarak produz rekursu umanu ne’ebé kualifikadu no profesional hodi ajuda dezenvolvimentu nasaun nian,” hatutan Julio.
Nasaun sira ne’ebé sei simu estudante Timor-Leste inklui Nova Zelandia, Cambodia no nasaun seluk tan. Maibé, nia admite katak sei iha dezafiu tamba kapasidade estudante balu seidauk sufisiente atu kompete iha nível internasionál.
Tanba ne’e, Julio enkoraja estudante sira atu kontinua esforsu no empeña an iha estudu, liu-liu iha área importante hanesan matemátika no siénsia sira seluk. Nia mós hato’o apelu ba inan-aman sira atu nafatin apoia no motiva oan sira atu estuda ho seriedade.
“Bolsa ne’ebé FDCH oferese la’os deit iha rai-laran, maibé mos iha rai-liur. Ida ne’e atu prepara ita nia nasaun ho rekursu umanu ne’ebé matenek no kualifikadu,” hakotu Julio Apariçio.
Jornalista/Estajiada :Domingas da Costa
Editor :Ana Maria
