(Díli) Bairo Pite- Fundasaun Forum Komunikasoens Juventude (F-FCJ) Oratoriu Dom Bosco, servisu hamutuk ho Ministériu Solidadariedade Sosiál no inkluzaun (MSSI sigla português) no Instituto para a Defesa dos Direitos da Criança (INDICA) oferese fundus 2.000 ba família uma kain 10 iha Federasaun Koperativa Kreditu Hanai Malu (sigla-FCCHM), liu husi programa reforsa família atu redus númeru labarik iha dalan ninin.
Diretora F-FCJ, Domingas Agusta Fátima Pereira, hatete, inisiativa ne’e atu redus númeru labarik sira iha dalan ninin liu husi reforma família atu proteje labarik no joven sira ne’ebé iha violensia nia laran.
“F-FCJ nu’udar organizsaun sosiedade sívil ativu iha Timor-Leste komprimisiu nafatin husi servisu sosiál no foka espesifiku ba área importante liu husi prevensaun no protesaun ba labarik no joventude, ita nia esforsu sira ne’e metin atu fornese fatin seguru no rehabilitasaun ba sira ne’ebé terus ba violensia grave no kompleksu sira”, hatete Diretora F-FCJ Domingas Agusta Fátima Pereira ba Média Mudansa iha Bairo-Pite Kuarta 05/11/2025.
Nia hatutan, liu husi fundus ki’ik ne’ebé sira simu, importante hatene jere atu labarik sira labele fa’an sasan iha dalan ninin ne’ebé sei fó risku ba labarik sira, maski programa ne’e hahú ho família nain 10 maibé sei kontinua ba oin.
Nune’e mós tuir prezidente INDICA, Dinorah Granadeiro, hatete, asuntu labarik fa’an sasan iha dalan ninin sai preokupasaun bo’ot ba governu liu-liu parte relevante sira, tanba ne’e tuir lolos sira iha kompetensia atu kondena família ne’ebé haruka oan ba fa’an sasan tanba lei fó dalan.
“Asuntu kona-ba labarik sira fa’an sasan iha dalan ninin, la’os asuntu ki’ik oan, tanba ne’e INDICA ho MSSI kuaze semana semana simu atensaun kona-ba situasaun ida ne’e, inan aman sira la dun sente katak ida ne’e hanesan situasaun ida ne’ebé perigu ba oan sira, hanesan instituisaun relevante tuir lolos ami iha kompetensia tomak atu fó sansaun ba ita bo’ot sira tanba lei fó dalan, iha kodigu penál ida ne’e tama ba krime organizadu no konvensaun direitu labarik mós bandu, ita mós agora iha lei kona-ba protesaun labarik no joven iha perigu, lei ne’e ko’alia klaru bainhira adultu ida mak organiza labarik sira iha risku, nia pena ne’e makas tanba ne’e lei fó dalan atu fó sansaun ba ita bo’ot sira, maibé ami hanoin katak ita hasai labarik sira husi risku labele hatama fali sira ba risku ketak ida”, nia hatete.
Nia htutatan, asesmentu ne’ebé mak sira hatudu, katak kondisaun família mak obriga labarik sira fa’an sasan, maibé iha família balu mak abuza poder hanesan família hodi hanehan labarik sira, sira ne’e INDICA sei halo prosesu hasoru sira tanba balun funsionariu no ekonomikamente la merese atu obriga oan ba fa’an sasan, sira servisu hamutuk oinsá mak bele aijuda ki’ik oan sira ne’e asesu ba fundus husi MSSI atu sira bele kontinua estudu no goja sira nia tempu hanesan labarik.
Iha sorin seluk reprezentante Diretór jerál Asuntu Sosiál, Manuela Oliveira, hatete, labarik sira fa’an sasan iha dalan ninin sai preokupasaun bo’ot governu nian, tanba inan aman sira seidauk iha konsiensia tanba ne’e MSSI servisu hamutuk ho parte relevante sira hodi proteje labarik sira husi violensia hotu.
“Labarik sira iha dalan ninin mak problema ida ne’ebé la hotu, governu soseidade sívil no seguransa sempre tilun hun manas ba asuntu ida ne’e, parese inan aman dalaruma menus konsiensia tanba ne’e mak ita hanoin katak oan sira bele ajuda ita, maibé ita la hatene katak ita fó hela risku, sofrementu perigu, fíziku no emosionalmente risku ba sira nia edukasaun no mós ba sira nia saúde, tanba ne’e MSSI hakarak hola parte iha ne’e tanba realidade hatudu ita nia rai laran labarik barak sedauk asesu ho di’ak ba edukasaun, servisu, protesaun labarik no servisu saúde, tanba ne’e MSSI nia papel mak hahú tau matan ba grupu vulneravel sira hahú husi labarik sira iha inan nia kanotak atu responde ba nesesidade presizu sira ne’ebé liga ba problema sosiál no bem estar labarik sira nian”, informa nia
Nia salienta, servisu sira ne’ebé governu hamutuk ho entidade relevante, organizasaun, sosiedade sívil sira halo la ses husi papel inan aman nian, bainhira inan aman la apoiu servisu sira ne’e sei la to’o iha metas ne’ebé hakarak atinji, bem estar no interese labarik nian tanba ne’e mak MSSI hanoin resposta ba situasaun sira ne’e, presiza servisu ne’ebé abordazen entre setorál no família mak hanesan sentru atu garante seguransa ba labarik, promove reintegrasaun sosiál ne’e hala’o husi MSSI hanesan entidade ne’ebé lidera, servisu hamutuk ho autoridade sira atu garante servisu sira ne’ebé ba asuntu bem estar labarik nian, hetan resposta ne’ebé lolos no atendimentu ne’ebé justu.
Nune’e, Xefe Suku Fatuhada, Marcelino Soares, apresia ho progarama redus labarik iha dalan ninin liu husi reforsa família tanba bele hases labarik no família sira husi risku, nia mós sujere ba família sira ne’ebé hetan fundus atu bele jere ho di’ak ba oan sira nia eskola no nesesidade família.
Entetantu orsamentu ba programa ne’e husi MSSI no implementa husi F-FCJ Oratoriu Dom Bosco
Jornalista: Mada de Lima /Zezinho de Jesus
Editora: Quisânia Gleide
