(Díli), Jardin 5 de Maio– Idade la determina ema nia kapasidade moris atu buka osan no oportunidade foun hodi hadia nafatin nia moris no oan sira nia futuru, hala’o negósiu la presiza hare’e ba idade nune’e mós hanesan inan faluk Elsa ne’ebé mak idade avansadu ona maibé nafatin tu’ur iha dalan ninin hodi hala’o nia negósiu nune’e bele atende oan sira nia estudu no bele hatutan moris ba loron naruk nian.
Inan Elsa Amaral, hanesan inan faluk ida ne’ebé mak forte luta ba oan sira nia futuru liu husi hala’o negósiu iha dalan ninin, maske ho idade ne’ebé mak avansadu ona la hamate nia vontade atu halo negósiu.
Hakarak luta ba oan nia futuru ne’ebé nabilan, faluk Elsa tu’ur iha dalan ninin hodi fa’an produtu sira hanesan Fore-rai no Krupuk, dala-ruma mós nia lao haleu jardin sira ne’ebé ema barak konsentra ba atu nia produtu bele folin, nune’e kada loron nia hetan dólar sanulu resin lima ($15) dala-ruma mós la to’o dólar sanulu resin lima, nia dehan, sasan ne’ebé mak nia fa’an ba sosa tutan iha merkadu hafoin ba fa’an fali.
“Ha’u hala’o negósiu fa’an produtu hanesan Fore-rai no Krupuk iha dalan ninin, maibé dala-ruma ha’u tenki lao ba iha jardin sira ne’ebé mak ema tu’ur barak atu sasan ne’ebé mak ha’u fa’an ne’e ema bele sosa, loron ida ha’u bele hetan dólar sanulu resin lima ($15) no dala-ruma la to’o”, dehan inan faluk Elsa Amaral ba Média Mudansa iha jardin 5 de maio, Sesta, 04/07/2025.
Inan faluk ne’e hatutan, nia tau prioridade liu ba iha oan sira nia estudu, tanba ne’e maske loron manas nia la sente kolen hodi hala’o negósiu, tanba oan balu komesa tama ona ba iha eskola Sekundária.
“Ha’u fó prioridade ba oan sira nia eskola no buka osan ba kabun, tanba ha’u nia oan balun komesa tama ona ba sekundária, balun sei iha primária, tanba ne’e ha’u nafatin iha esperansa hodi halo negósiu no ha’u la tane liman ba ema no ba família sira atu sustenta ha’u ho oan sira”, dehan faluk ne’e.
Moris husi família ne’ebé mak diferente ho ema seluk hodi obriga nia tenki esforsu atu bele sustenta sira nia moris, nune’e mós ba oan sira nia futuru, no nia sei la depende ba ema seluk nia ajuda.
Ho idade ne’ebé mak avansadu ona lamerese ba nia atu tu’ur iha dalan ninin hodi buka osan, maibé situasaun moris ne’ebé mak obriga nia tenki tu’ur iha dalan ninin no tenki leba Fore-rai no Krupuk lao haleu jardin sira hodi hetan netik dólar ida ka rua ba oan sira nia futuru no nesesidade loro-loron nian.
Faluk ne’e husu ba foin sa’e feto sira atu esforsu rasik ba moris ne’ebé mak di’ak, koko buka rasik osan ba futuru, nia mós hakarak motiva foin sa’e sira atu labele hein de’it servisu ne’ebé mak formal, maibé hahú fó valór ba kapasidade ne’ebé sira iha hodi halo buat di’ak rum aba sira nia an no ba ema seluk.
“Husu ba joven feto sira katak moris atu di’ak ne’e presiza esforsu rasik, koko buka rasik osan, maibé presiza esforsu ho liman ain rasik, ha’u hakarak motiva feto sira atu la hein de’it servisu formál, maibé hahú hodi fó valór ba kapasidade ne’ebé mak imi iha hodi halo buat ne’ebé mak di’ak ba imi nia an no di’ak mós ba ema seluk”, dehan faluk Elsa.
Entretantu, faluk ne’e hahú nia negósiu iha sidade Díli iha tinan 2004 to’o da-daun ne’e, Inan Elsa Amaral, ho idade hitu-nulu (70), husi Munisípiu Viqueque, Suku Kraras, da-daun ne’e hela iha merkadu Taibesse, faluk ne’e iha oan na’in hitu (7) kompostu husi feto ha’at (4) no mane na’in tolu (3), enkuantu faluk nia laen fila hikas ona ba maromak nia kadunan santu.
Jornlista: Inácio Silva/Estagiada Esperansa Soares
Editora: Sandi Belo
