(Díli) Colmera-Dircelita hanesan joven feto ne’ebé mak la moe halo negósiu iha dalan ninin hodi haforsa ekonomia família no ajuda nia nesesidade loro-loron nian.
Negosiante ne’e hatete, do’ok husi inan aman la fasil tanba ne’e nia halo negó siu ki’ik iha dalan ninin hodi bele suporta nia estudu no bele haforsa ekonomia família.
“Ha’u halo negósiu ne’e tanba bele ajuda ha’u nia maen no pai bele selu rasik ha’u nia eskola no selu bemo, tanba ita do’ok husi inan aman ne’e la fasil no ha’u halo negósiu ki’ik sira ne’e atu bele rezolve lalais ha’u nia problema sira ne’e”, nia dehan ba jornalista Média Mudansa iha tasi ibun Palacio Governo Kinta, 03/08/2025.
Nia hatutan, maske kada loron ema kompra minimu liu maibé nia nafatin halo nia negósiu, no osan ne’ebé nia hala’o negósiu hetan husi fa’an ai-moruk Health Wealth International (HWI Sigla Inglês) no iha bonus $10 ho ida ne’e mak nia sosa fali sigaru hodi bele fa’an iha dalan ninin.
“Redimentu ne’ebé ha’u hetan loro-loron mak $10 to’o $20, osan ne’ebé ha’u halo negósiu ne’e ha’u nia orsamentu rasik no osan ne’e ha’u hetan husi produtu HWI, no bonus ne’ebé hetan mak $10 ho ida ne’e ha’u uza hodi bele halo fali ba negósiu ki’ik iha dalan ninin ne’e”, dehan nia
Aleinde ne’e nia mós dehan, sasan sira ne’ebé nia fa’an ne’e la dun folin tanba estudante lubuk mak fa’an produtu ne’ebé hanesan.
“Dezafius loro-loron ne’ebé ha’u hetan mak kada vez ha’u nia produtu hirak ne’ebé ha’u fa’an ema la hola liu tanba ema barak mak fa’an la’os ha’u mesak fa’an sasan hirak ne’e no impaktu ba ha’u dala-ruma la hetan liu redimentu”, nia akresenta.
Nia mós husu ba nia feto maluk foinsa’e sira atu labele moe halo buat di’ak, tanba moe sei la fohan ema.
“Ba ha’u nia maluk joven sira liu-liu ba ha’u nia feto maluk sira atu labele moe fa’an iha dalan ninin no ita tenki iha mentalidade ne’ebé di’ak hodi halo negósiu tanba moe ne’e la fohan ita no ita nia moe bele hamonu ita”,nia hakotu.
Entretantu negosiante Dircelita Soares husi Munisípiu Lautém, Postu Iliomar, Suku Trilolo, ho idade 19 ne’ebé mak da-daun ne’e hala’o hela nia estudu iha Universidade Orientál Timor-Lorosa’e (UNITAL), Fakuldade Edukasaun no Departamentu Língua Portuguêsa.
Estajiada: Maya Luanda
Editora: Sandi Belo
