(Díli) Becora-Universidade Orientál Timor-Lorosa’e (UNITAL) sesta ne’e halo konferensia imprensa relasiona ho intervensaun husi Deputadu Luis Roberto husi bankada KHUNTO ne’ebé levanta iha plenaria parlamentu nasionál kona-ba kualidade ensinu superior iha universidade privadu balu ne’ebé manipula sistema inskrisaun akadémiku hodi fasilita estudante ne’ebé asesu ba ensinu superior la iha dokumentus komprovativus, nune’e hodi foti UNITAL sai hanesan ezemplu ba mál administrasaun ida ne’ebé afeta ba kualidade ensinu, tanba ne’e husu deputadu Luis Roberto atu husu deskulpa ba estrutura Universidade nian.
Porta voz Juvencio dos Santos hatete, deputadu Luis Roberto foti UNITAL sai hanesan ezemplu ba mál administrasaun ne’ebé afeta ba kualidade ensinu ho ida ne’e UNITAL rezeita totálmente ba informasaun falsa no lalós ne’ebé deputadu ne’e levanta iha plenaria parlamentu nasionál.
“Deputadu Luis Roberto levanta iha plenaria parlamentu nasionál kona-ba kualidade ensinu superior iha universidade privadu balu ne’ebé manipula sistema inskrisaun akadémiku hodi fasilita estudante ne’ebé asesu ba ensinu superior la iha dokumentus komprovativus, deputadu Luis Roberto foti UNITAL sai hanesan ezemplu ba mál administrasaun ne’ebé afeta ba kualidade ensinu ho ida ne’e UNITAL rezeita totálmente ba informasaun falsa no lalós ne’ebé deputadu ne’e levanta iha plenaria parlamentu nasionál,” dehan porta voz Juvencio dos Santos iha konferensia imprensa iha salaun UNITAL Becora, Díli, Sesta 13/06/2025.
Nune’e nia hatutan, UNITAL nu’udar institutu superior ne’ebé parseira ho Ministériu Ensinu Superior Siénsia no Kultura (MESSC sigla português) nu’udar instituisaun governu ne’ebé regula universidade hotu-hotu hodi aposta ba kualidade ensinu ho nune’e UNITAL kumpri regras Sistema inskrisaun ne’ebé estabelese husi MESSK.
“Tanba ne’e UNITAL husu ba Deputadu Luis Roberto atu hatudu dadus no provas konkretu hodi indemina ba MESSK, rekoñese katak nia pernah hanorin iha Fakuldade Siénsia Sosiais no Polítika no rekoñese katak nia señora mós lisensiada no mestrada iha UNITAL, husu atu rekoñese mós alumi UNITAL ne’ebé sai deputadu, kaer kargu importante sira iha instituisaun governu hanesan Ministériu, Polísia Nasionál Timor-Leste (PNTL sigla português) no Forsa Falintil Defeza Timor-Leste (F-FDTL sigla português) no mós autoridade lokais sira ba iha instituisaun privadu balu, ami mós husu ba deputadu Luis Roberto atu husu Deskulpa ba UNITAL nia alumi liu rihun ne’en (6000) no estudante ativu rihun lima atus hitu (5700) no husu deskulpa ba estrutura tomak husi Universidade UNITAL nian,” nia salienta.
Iha fatin hanesan reitor Universidade Orientál Timor-Lorosa’e (UNITAL) Claudino Ninas Nabais, hatete, deputadu Luis Roberto nia intervensaun la koresponde ba realidade tanba ne’e nu’udar instituisaun akadémiku hamutuk ho komunidade tomak UNITAL nian halo reasaun no jestu akadémiku.
“Ami halo resaun no jestu akadémiku nian, ami la presiza no la obriga nia atu husu deskulpa, maibé ami atu hanorin nia katak liu husi instituisaun akadémikus mak forma sira no deputadu balu mós gradua husi universidade ida ne’e no iha mós funsionariu PNTL, F-FDTL, Professores no asesor lubuk ida mak gradua husi UNITAL, ida ne’e hatudu katak Universidade ne’e iha kualidade tanba ne’e mak alumi sira absove ba iha orgaun importante sira ne’e,” esplika reitór UNITAL.
Reitor ne’e dehan, kona-ba inskrisaun mal jestaun ba estudante sira ne’ebé foin halo inskrisaun da-uluk maibé hakat liu ba iha semester 3 no balu la iha diploma eskola sekundária maibé universidade nafatin simu, ida ne’e la eziste iha Unital.
“Mál jestaun ba inskrisaun estudante foun ne’ebé la iha diploma husi eskola sekundária maibe universidade nafatin simu sira ni balu hakat liu ba iha semetr 3, ha’u hanoin ida ne’e la eziste tanba Sistema dijitalizasaun ne’ebé mak ensinu superior estabelese ne’e rogorozu oituan bainhira alista ka rejistadu iha sistema ne’e quer dizer ita kompleta hotu ona dokumentus sira ne’ebé faz parte ba rekezitus sira husi ensinu superior molok tama ba graduasaun, tanba prosesu gradusaun ne’e lubuk ida mak kada universidade tenki halo verifikasaun molok sira nia naran ba públika iha jornál repúblika ofisialmente hafoin graduasaun”, dehan reitor ne’e
Nune’e reitor ne’e mós rezeita totalmente informasaun kona-ba estudante foun ne’ebé mak atu halo rejistrasaun iha UNITAL tenki halo deklarasaun husi Xefe Suku, nia dehan ida ne’e la eziste tana la faz parte ba iha kompletu rekezitus bainhira ba halo inskrisaun.
Enkuantu reitor ne’e mós husu ba estudante sira atu kontinua nafatin sira nia estudu no lalika rona informasaun husi liur, UNITAL prontu eduka no forma estudante sai kualidade.
Jornalista: Inacio Silva
Editora: Sandi Belo
