(Internasional)- Papa Leão XIV hato’o sentidu kondolénsia kle’an ba vítima sira hosi asidente trájiku aviaun nian ne’ebé akontese iha Loron Kinta-feira, 12 fulan Juñu tinan 2025, besik sidade Ahmedabad nasaun Índia, ne’ebé envolve aviaun Air India nian ida. Iha telegrama ne’ebé asina husi Kardeál Sekretáriu Estadu Pietro Parolin, Santu Padre hato’o sentidu kondolénsia ba família no belun sira husi sira ne’ebé lakon sira-nia vida iha trajédia ne’e.
“Iha momentu moras no lutu nian ida-ne’e, Sua Santidade haruka nia orasaun sira no garante nia proximidade espirituál ba sira hotu ne’ebé afetadu hosi asidente ne’e”, haktuir testu.
Pontífise mós konfia “matebian sira nia klamar ba mizerikórdia hosi Ida ne’ebé maka’as liu” no invoka “bensaun divina sira kura nian no dame nian” ba ema kanek sira, ba salvadór sira no ba sira hotu ne’ebé envolve iha esforsu sira salvamentu nian.
Telegrama ne’e haruka ba autoridade ekleziástiku lokál sira no ba sira ne’ebé responsavel atu tulun vítima sira. Asidente ne’e akontese bainhira aviaun Air India AI171, ne’ebé maka sai hosi Ahmedabad hodi ba Aeroportu Londres Gatwick, monu minutu balun hafoin semo. Iha aviaun laran, Boeing 787-8 Dreamliner, iha pasajeiru na’in 232 no tripulante na’in 10. Entre okupante sira iha sidadaun indianu na’in 169, britániku na’in 53, portugés na’in 7 no kanadianu na’in 1.
Tuir informasaun hosi polísia lokál, ema na’in 200 resin maka mate iha impaktu, maibé esforsu sira buka no salva nian kontinua iha zona dezastre nian. Autoridade sira sei investiga nafatin kauza sira hosi asidente ne’e, konsidera hanesan ida ne’ebé maka grave liu iha aviasaun indianu iha tinan hirak ikus ne’e.
Fontes: (Vaticannews)
