Internasionál – Iha tempu ne’ebé mundu enfrenta fenomena evitasaun notísia, Workshop Internasionál HWPL kona-ba Estudu Jornalizmu Dame nian lori mensajen ida klaru jornalizmu bele sai dalan atu hamosu esperansa no kontribui ba dame.
Eventu ne’e hala’o online no halibur jornalista hamutuk 220 resin husi rai oin-oin, ho tema “Solusaun sira ba Reportajen iha Era Evitasaun Notísia nian, Hametin Ajénsia Audiénsia nian liuhosi Kolaborasaun Pás Mídia-Sivíl”. Diskusaun sira foka ba oinsá mídia bele responde ba dezafiu evitasaun notísia, hamenus konflitu, no promove dame iha sosiedade.
Iha workshop ne’e, jornalista na’in tolu ne’ebé kontribui ba publikasaun HWPL Peace Journalism Studies Volume 4 fahe sira-nia peskiza no esperiénsia, ho énfase ba importánsia jornalizmu ne’ebé la’ós de’it relata eventu, maibé mós buka no hatudu solusaun.
Tuir Jornalista husi Indonézia, Achmad Yani, hatete katak narrativa mídia iha influénsia boot ba oinsá públiku haree konflitu. Nia esplika katak maioria kobertura mídia globál sei foka liu ba konfrontu militár no tensaun polítika, enkuantu história ema sivíl afetadu barak la hetan atensaun.
“Mídia iha poder atu forma komprensaun públiku, tanba ne’e importante atu inklui perspetiva vítima no promove dalan pasífiku sira,” nia dehan.
Iha sorin seluk Yusnita, subliña tan katak dame la’ós de’it ausénsia funu, maibé kondisaun ne’ebé bazeia ba seguransa, igualdade no justisa. Nia enfatiza katak atu atinji dame, presiza esforsu hamutuk husi governu, sosiedade no mídia, inklui relatóriu responsavel no promosaun toleránsia.
Enkuantu, José Nicolás Arroyo Ramos mós deklara tan katak, violénsia diskursiva iha era dijitál, ne’ebé bele hamosu divizaun maske laiha violénsia fízika. Nia hatete katak konteúdu emosional no la verifikadu espalla lalais, no bele simplifika problema kompleksu sira. Tuir nia, jornalizmu dame nian bele sai alternativa liuhosi esplora kauza abut no apresenta solusaun konstrutivu.
Maske hala’o liuhosi plataforma online, partisipante sira kontinua envolve ativu iha diskusaun, inklui troka ideia kona-ba oinsá kria notísia ne’ebé bele inspira esperansa no hametin audiénsia nia konfiansa ba mídia.
Workshop ne’e mós introdús Plataforma Mídia no Pás Globál (MAGP), rede ida ne’ebé liga jornalista no organizasaun sosiál husi rai oin-oin atu fó apoiu ba dezenvolvimentu jornalizmu dame nian.
Organizadór sira fiar katak mídia la’ós de’it meiu atu fahe informasaun, maibé mós forsa importante ida iha formasaun opiniaun públika no konstrusaun dame. Ho kolaborasaun internasionál ne’ebé kontinua, sira espera jornalizmu bele sai ponti ida atu liga diferensa sira no buka solusaun ba futuru ne’ebé di’ak liu.
Fonte : Workshop Internasionál HWPL
Editor : Francisco Pereira
