(Díli)Taibessi – Padaria Big Jhon ne’ebé mak loke mini padaria iha área merkadu Taibessi hanesan motivasaun no esperiénsia ne’ebé nakloke iha padaria Lumi, Big Jhon ho objetivo atu dezenvolve moris no hetan independénsia ekónomika iha merkado
Nain ba Padaria Big Jhon, Januario Magno, ho idade tolu-nulu resin ha’at (34), husi Munisípiu Ainaro, Postu Ainaro, Suku Ainaro, halo negósiu iha merkado Taibessi ho esperansa ne’ebé iha atu bele hadia nia futuru, no hetan Mudansa ba aban rua nian.
“Ami hetan esperiénsia barak hodi nune’e ami bele hafanun-an no iha konfiansa atu halo atividade sira ne’ebé bele habelar tan produtu ida ne’ebé ami produz rasik iha fatin Merkadu Taibesi, ami hahú primeiru atu hari padaria ho naran Big Jhon, ho orsamentu $50 Dólares Amerikanus, husi osan ne’e mak ami uza atu jere sasan sira ne’ebé ami presiza fó servisu iha área merkadu Taibessi, fó exemplo kona-ba motivasaun no determinasaun, liu husi esperiénsia ne’ebé nakloke iha Padaria Lumi, Big Jhon loke mini padaria ida ne’e ho objetivo atu dezenvolve moris no hetan independénsia ekónomika”, dehan Januario Magno ba jornalista Média Mudansa, iha Merkadu Taibessi, Quinta, 26/06/2025.
Nia hatutan, kada loron sira fa’an produtu ho fólin $0,10 to’o $0,25 sentavus, tanba fólin ne’e ajusta ba kondisaun estudante, maski fólin ne’e minímu, maibé la hamate sira-nia vontade atu kontinua habelar no servisu hamutuk.
“Kada loron, ami hetan redimentu $50 Dólares Amerikanus, Produtu sira ne’ebé mak ami fa’an hanesan Pizza, Donat, Paun Keiju, Inklui mos sira seluk tan, Ema ne’ebé durante sosa ami nia produtu sira ne’e maioria husi alin estudante sira no komunidade iha área merkadu Taibesi nian”, nia informa
Entertantu nain ba mini padaria Big Jhon husu ba Joven feto no mane tenki halo vantagem ba moris, ne’e la bele moe, saida mak mehi ne’ebé a’as, tenki uza ho sabedória no plano, antes atu halo buat ida, tenki iha preparasaun no isin moris nafatin la bele lakon vontade, tanba esforsu bele ajuda hodi hetan benefísiu ne’ebé di’ak.
Jornalista: Inácio Silva/Estagiada, Maya Luanda
Editora: Gaudencia Belo
