(Díli) Yayasan HAK Farol – Associação de Jornalista Timor-Leste (AJTL),kolaborasaun ho United Nations Educational Scientific and Cultural Organizatiom (UNESCO sigla Inglés), hala’o treinamentu no dezenvolve ba Jornalista Timor sira durante loron rua, hodi aumenta kapasidade sira nian iha área jornalizmu ambiental, liu-liu kona-ba mudansa klimátika, atividade ne’e fó prioridade ba kobertura asuntu ne’ebé hetan impaktu direto ba komunidade no vulnerável sira.
Iha entervista ne’e Prezidente AJTL, Jevonia Vieira hateten, treinamentu ba loron daruak ne’e nu’udar parte importante ida hodi planu estratéjiku atu enkoraja jornalista sira iha Timor-Leste no fó prioridade ba tema mudansa klimátika, tanba impaktu ne’e bo’ot tebes ba sosiédade, liu-liu ba feto, labarik no ema ho defisiénsia iha área remota.
“Importante maka Informasaun sira ne’ebe fo sai ne’e tenki liga ho ámbiental, entaun iha loron rua ne’e treinador husi Jakarta sei halo diskusaun klean ho Jornalista sira atu identifika Isu sira ne’ebé mak importante no sai Preukupasaun ema hotu nian, óinsa mak atu buka solusaun hodi rezolve ida ne’e”, dehan Presidente (AJTL), Jevonia Vieira, ba Jornalista sira, iha fatin Dili foin lalais ne’e.
Presidente ne’e relata, husi treinamentu ida ne’e atu dezenvolve Jornalista sira husi plataforma Média Online no Média Imprime sira hodi aprende hamutuk ho treinador Harry Surjadi ne’ebe mai husi Jakarta hodi fahe téknika reportajen klean kona-ba Mudansa Klimátika, no sei iha diskusaun tuir Grupu ida-idak no sira sei identifika Isu ambiénte sira ne’ebé mak importante iha Timor-Leste, no buka dalan atu fó solusaun.
“Jornalista sira tenki iha Inisiativa rasik atu husu Xefi redasaun óinsa mak atu ke klean asuntu Mudansa Klimátika ne’ebé mak ema barak hasoru no ita seidauk tau intensaun mázimu ga seriu iha ne’eba, atu nune’e bele haforsa katak Jornalista iha interese no atensaun ba ambiéntal no mós ajuda ita nia Estadu no komunidade bele buka solusaun ho rezultadu ne’ebé mak ema hotu-hotu hakarak no ita bele Proteje ita nia ambiental”, Nia afirma
Entretantu iha Treinamentu Workshop ida ne’e hetan Partisipasaun mázimu mai husi Jornalista Média Imprime no Média Online sira, hamutuk Sanulu resin sia (19)
Jornalista: Inácio Silva da Conceicão
Editora: Gaudencia Belo
