(Díli) MAF – Mission Aviation Fellowship (MAF) mak hanesan organizasaun Kristaun globál ida ne’ebé fornese aviasaun no teknólojia hodi suporta komunidade sira ne’ebé hela iha area remota, iha mundu tomak no iha situasaun emerjénsia nia laran.
Tuir pilotu MAF, Joe Farren, hateten, hala’o evakuasaun médiku salva ema moras grave sira liu husi 200 kada tinan husi Munisípiu ualu (8) ualu ne’ebé diferente iha Timor-Leste no MAF halo kooperasaun no akordu parseiru ho Ministériu Saúde iha Timor-Leste.
“Tanba parseria ida ne’e, servisu emerjénsia médiku ida ne’e iha nasaun tomak asegura katak pasiente Timor-oan sira ne’ebé presiza tratamentu urjente halo transferensia ba pasiente la ho kustu”, dehan Joe Farren, Kinta, 8/05/2025
Nune’e nia relata, Voo evakuasaun médika (medevac) liu husi Mission Aviation Fellowship (MAF) iha esperansa atu tulun no kura pasiente bebé Geovanio dos Santos, ho idade tinan ida (1) husi Suai ba Díli, tanba iha parte kosta sudoeste Timor-Leste, permite nia atu hetan tratamentu salva-moris iha Ospital Nasionál Guido Valadares (HNGV) Díli.
“Pasiente bebé Geovanio hetan moras diagnóstiku kona-ba hidrocefalus ho kondisaun ne’ebé akumula ho fluidu, kauza ameasa bo’ot ba nia saúde, tanba ne’e nia presiza voo evakuasaun médika emerjensia husi Suai atu simu asisténsia médika iha Ospitál Nasionál Gidu Valadares Díli”, dehan pilotu ne’e.
Pilotu ne’e sente kontente bainhira hetan oportunidade hodi salva ema seluk nia vida.
“Ida ne’e hanesan bensaun ida husi Na’i Maromak ne’ebé fó oportunidade mai ami atu envolve iha ema nia moris no ha’u kontente tebes tanba ha’u hola parte iha pasiente ida nia jornada ba saúde no rekuperasaun”, tenik Joe
Nune’e bebé nia aman Ribeiro hatete, nia tanis iha momentu ne’ebá tanba nia oan iha kondisaun ne’ebé susar atu trata, no karik la iha aviaun MAF, família sei lakon oan nia vida.
“Ha’u tanis iha momentu ne’eba tanba hare’e ba ha’u nia oan nia kondisaun ne’ebé mak susar atu halo tratamentu ba nia saúde, maibé ho tulun husi Aviaun MAF ami bele evakua ha’u nia oan mai halo tratamentu iha Ospitál Nasionál Guido Valadares Díli, karik la iha MAF mak ami sei lakon ami nia oan nia vida”, hakotu nia.
Informasaun ne’e Média Mudansa asesu husi pajina offisiál Mission Aviation Fellowship (MAF) Communications Officer.
Jornalista: Zemidonio Martins
Editora: Sandi Belo
