(Díli)-grupu solidariedade ba Ano Rap (GRUSAR), hamutuk ho Ano Rap rasik hato’o agradese ba ema hotu ne’ebé mak apoiu moral no finansiál ba Ano Rap hodi halo tratamentu fase ran iha Malaysia, relatóriu husi rezultadu konsertu muzika ne’ebé hetan fundu ka kustu hodi halo tratamentu ba Ano Rap nia saúde.
Tuir porta voz Ismenio Nito Mardasil,dehan, husi grupu solidariedade Ano Rap, ne’ebé mak iha fulan kotuk loron 22-23, sira organiza konsertu ida hodi fó apoiu ba Ano Rap ne’ebé mak moras, la konsegue fase ran, no mós fulan ida sira foin ba fali hodi bele hato’o sira nia relatóriu badak ida iha públiku husi rezultadu ne’ebé sira halo.
Nune’e nia haktuir katak, hafoin konsertu ne’e sira konsegue hetan kustu hodi apoiu ba tratamentu Ano Rap nian, no husi kustu tratamentu ida ne’e sira hetan ajuda husi kustu administrasaun, ba iha Ospital Gleneagles Malaysia ho nia metaiz sira iha ne’e, no mós sira prepara relatóriu husi diskusaun orsamentu ne’ebé mak sira hetan, no mós despeza sira durante halo konsertu ne’e,
“Orsamentu ne’e ami hetan husi bileti ne’ebé mak ekipa fa’an tiket totál hamutuk 2,483 tiket no mós rezultadu husi tiket ne’e osan kuaze, $4,966, no mós hetan osan husi doasaun ka konstribuisaun pesoál sira ka entidade hamutuk, $ 5,434, ne’e duni totál osan sira ne’ebé hetan hamutuk $10,574, husi osan $10,574 ne’e selu ba kustu tratamentu Ano Rap nian por volta $10,280 no troka ba ringit osan malaysia nian mak $45,000 ringit, husi osan ne’ebé mak sei iha ami prepara nia dadus ne’e hato’o ba públiku hodi hatene osan hira mak ami hetan”, dehan porta voz Ismenio Nito Mardasil, liu husi konferensia imprensa, segunda foin lalais ne’e.
Porta voz ne’e mós agradese ba sira ne’ebé hola bileti no mós sira ne’ebé fó doasaun maske la partisipa iha konsertu maibé sira fó ho laran duni hakarak apoiu ba Ano Rap, ba maluk muzika sira hanesan; Deo Ataide no Baina Band, Izu Mausoko, Jentiu band, Infernu band, Alkatraz, Metál Maubere no sira seluk tan, no mós agradese ba Ministériu Juventude Desportu Arte no Kultura (MJDAK), ne’ebé fó ona fatin, no mós ba nai ulun sira ne’ebé iha ida ka rua fó sira nia kontribusaun individualmente hodi fó apoiu ba iha Ano Rap, ba kanál produsaun Média Mudansa ne’ebé mak apoiu produsaun video iha tempu ne’eba.
Nune’e kustu ba viajen no mós ba iha alozamentu nian família husi Ano Rap rasik mak apoiu.
“Ami sei iha planu mós atu bele hare’e Ano Rap nia mehi iha future, karik nia hakarak halo buat ruma hodi bele ajuda liutan ba nia kondisaun, ami bele halo atividade balu ne’ebé tuir mai hodi bele ajuda no mellora liu tan nia kondisaun, atu ita hotu halo tan atividade balu ne’ebé sei ajuda nia”, hatutan porta voz ne’e.
Iha fatin hanesan, katór Ano Rap, husu agradese ba ema hotu ne’ebé apoiu husi morál no finansiál ne’ebé sira halo sem nia hatene, maibé ajuda duni nia iha tempu ne’ebé nia hetan susar, nia mós agradese ba família ne’ebé suporta nafatin nia no mós ba sira ne’ebé mak sosa ona tiket hodi apoiu solidariedadeba nia.
“Ha’u la iha mehi bo’ot ba ha’u nia an, maibé agora ne’e ha’u hetan tan tratamentu fase ran hanesan normál, tanba kondisaun hanesan normál, maibé sei hein tan prosesu tratamentu tanba nia asesu husi fase ran ne’e seidauk di’ak ho nune’e ha’u labele dehan katak 100% ha’u ne’e di’ak ona, tanba ha’u nia asesu fase ran ne’e seidauk di’ak, ne’ebé ha’u sei uja hela mangera iha kakorok no sei kontinua fase ran atu ha’u bele moris nafatin”, hakotu nia.
Jornalista: Rogerio Anuno
Editora: Gaudencia Belo
