(Díli) Kampung Alor– Inan Faluk Rosalina Soares hala’o negosiu iha dalan ninin tanba oan sira nia presija no hodi atende ba nesesidade uma laran.
Inan Faluk Rosalina fa’an bee, kafe, sigaru, white coffie no ABC mocca iha dalan ninin hodi sustenta nesesidade uma laran.
“Ha’u hala’o negosiu ida ne’e tanba ha’u ho labarik sira mesak no ha’u atu han hemu nian mós la iha entaun ha’u tenki obriga an fa’an sasan sira hanesan bee, kafe, sigaru, white coffie no ABC mocca atu hetan osan hodi sosa labarik sira nia hahan tanba sira nia apa mate ona”, dehan faluk Rosalina Soares ba Média Mudansa iha Kampung Alor, Segunda, 10/03/2025.
Inan faluk ne’e mós hatutan, nia hahú negosiu ne’e ho modal $10.00 dólar hodi sosa sasan sira ba fa’an, nune’e kada loron nia hetan dólar $5 husi negosiu ne’ebé nia hala’o.
“Ha’u hahú negosiu ne’e ho modal $10.00 dólar hodi ba Sosa bee no kafe mai fa’an iha dalan ninin maibé ha’u fa’an seidauk to’o fulan ida, no negosiu ne’e kada loron ha’u la hetan rendimentu bo’ot maibé ha’u nafatin fa’an tanba oan sira nia presija no nesesidade uma laran nian, no loro-loron ha’u hetan osan mak $5.00 dólar mai kraik tanba ha’u uza ho modal ne’ebé mak ki’ik mais ha’u agradese nafatin”, nia konta.
Dadersan tuku 6:00 faluk Rosalina sai husi nia horik fatin Palapasu ba Kampung Alor hodi hala’o nia negosiu to’o tuku 8:30 hafoin nia fila hikas husi fatin negosiu ba nia uma.
“Ha’u sai husi uma mai fa’an sasan tuku 6:30 dader mai to’o iha fatin ne’e 7:10 entaun ha’u to’o fatin ne’e ha’u komesa fa’an ona no ha’u fa’an to’o tuku 8:30 kalan hafoin ha’u fila ona ba uma deskansa nune’e aban ha’u kontinua fa’an sasan”, dehan faluk ne’e.
Faluk ne’e haktuir, kada loron nia ba halo negosiu to’o oras meiudia nia fila ba uma han tiha hafoin nia deskansa netik minute balu hodi kontinua ba hala’o fali nia negosiu iha Kampung Alor.
Entretantu faluk Rosalina iha oan nain ha’at (4) no nia oan sira labele kontinua sira nia estudu tanba aman ne’ebé sai hanesan Xefe família fila hikas ona ba mundu seluk, tanba ne’e oan sira ba hela hotu iha foho no la kontinua eskola, enkuantu inan faluk ne’e ho idade 37 no husi Munisípiu Manatutu.
Jornalista: Inácio Silva/ Estajiadu: Hilario Chayfan
Editora: Sandi Belo
