(Díli) Fomentu II– Institute Of Buseness (IOB) realiza Workshop ho tema Prevene violénsia hasoru feto ho labarik feto hodi promove zero toleransia ba asediu seksual iha universidade Institute Of Buseness IOB
Diretora Jeral Interina Sekretáriu Estadu Igualidade Jeneru, Apolonia da Cunha iha nia diskursu hatete, universidade sira nia servisu hamutuk hodi kontribui ba implementasaun no planu asaun violénsia bazeia ba jeneru iha Timor-Leste, tanba asediu seksual mós akontese iha kampus ne’ebé mak autór ne’e rasik husi professor ho estudante no inklui mós estudante ho estudante.
“Ita hotu hatene katak violénsia bazeia ba jeneru inklui asediu seksual hanesan violasaun kontra feto no labarik feto nia direitu ne’ebé akontese barak iha sosiedade inklui sosiedade Timor-Leste, asediu seksual mós akontese iha kampus ne’ebé autór mai husi professor no estudante, entre estudante ho estudante sira, asediu seksual fó impaktu negativu la’os de’it ba feto maibé ba instituisaun kampus no ba komunidade kampus ne’e rasik, tanba ne’e presiza kria mekanizmu atu halo prevensaun ba violénsia bazeia ba jeneru iha kampus liu husi estabelese polítika ba prevensaun no protesaun ba vítima, hasa’e koñesementu instituisaun akadémika nian no mós kria mekanizmu kampus atu halo prosesu hato’o keixa no relatóriu”, dehan Diretora Jeral Interina Sekretáriu Estadu Igualidade Jeneru, Apolonia da Cunha iha nia diskursu, iha salaun IOB, Sesta, 14/03/2025
Diretora ne’e hatutan, SEI koordena implementasaun no planu asaun nasionál violénsia bazeia ba jeneru husi tinan 2022 to’o 2032, kna’ar importante ida mak atu hasa’e koñesementu públika kona-ba prevensaun violénsia bazeia ba jeneru no diskriminasaun sira ne’ebé akontese iha públiku inklui iha kampus.
“Tanba ne’e ohin ita hahú diálogu atu introdus kona-ba saida mak kampus seguru no mekanizmu saida mak tenki estabelese no asegura kampus bele seguru, modelu kampus seguru hahú implementa ona iha Universidade Nasionál Timor-Lorosa’e (UNTL), ne’ebé hetan apoiu husi UN Women no SEI no apoiu fundus husi governu Corea ka COICA”, informa nia
Iha fatin hanesan vice reitor III, Ludovina Maria Victor hatete, IOB asina ona plaka ba prevensaun asediu seksual ho Ministériu Ensinu Superior tanba ne’e IOB iha komitmentu hodi promove zero toleransia ba asediu seksual.
“IOB asina ona plaka ba prevensaun asedu seksual ho Ministériu Ensinu Superior tanba ne’e IOB iha komitmentu hodi promove zero toleransia ba asediu seksual, objetivu husi workshop ida ne’e oinsá bele halo prevensaun ba violénsia bazeia ba jeneru no mós asediu seksual no ajuda mós oinsá bele halo atuasaun ba kazu ida ne’e tuir prosedur ne’ebé mak lo’os”, dehan vice reitor III, Ludovina Maria Victor
Enkuantu estudante Anita da Costa informa, vantajen husi workshop ne’e atu fó hanoin ba sira liu-liu ba feto sira atu prevene an husi asediu seksual
“Vantajen husi workshop ida ne’e atu fó hanoin liu-liu ba ami feto sira atu prevene an husi asediu seksual no wainhira hasoru violénsia ka asediu seksual presiza fó hatene atu nune’e bele hado’ok an husi asediu seksual”, dehan Anita da Costa
Anita mós husu ba joven hotu-hotu no liu-liu ba nia maluk feto sira presiza prevene an no hado’ok an husi violénsia ka asediu seksual.
Entretantu estudante hamutuk ha’at nulu (40) no mós dosente hamutuk sanulu (10) mak partisipa iha workshop ne’e no estudante ne’ebé mak partisipa iha workshop ne’e kompostu husi fakuldade Ict, Ekonomia Negosiu, Enjenaria no mós Hospitalidade Turízmu no workshop ne’e hetan partisipasaun husi SEI, UN Women, Fokupers, Alfela, Programa Nabilan, Xefe Departamentu Prevensaun Violénsia Bazeia ba Jeneru no Xefe Departamentu Abordajen Integradu Jeneru.
Estajiadu: Nelinho dos Reis
Editora: Sandi Belo
