(Díli) UNTL- estudante admitidu 2025 iha Universidade Nasionál Timor-Lorosa’e (UNTL) manifesta sira nia lamentasaun hasoru estrutura Universidade no asosiasaun akadémika estudantil ne’ebé organiza prosesu inskrisaun iha UNTL la tuir matadalan no regulamentu orientasaun akadémika nian, tanba ne’e sira husu Universidade atu devolve fali sira nia osan ne’ebé mak kada fakuldade ida-idak halo kobransa.
“Ami husi estudante foun Universidade Nasionál Timor-Lorosa’e UNTL ne’ebé iha loron 31 fulan janeiru tinan 2025, Ministériu Ensinu Superior Siénsia no Kultura Ofisialmente públika ami nia naran hanesan estudante admitidu mai iha UNTL ho total 5.218, husi númeru ne’e mak sei koloka ba fakuldade 10 ne’ebé eziste iha UNTL no ami estudante admitidu 2025 halo ona rezistrasaun hahú iha loron 17/02/2025 to’o loron 11 fulan masru no atualmente kalendariu rezistrasaun extende ona husi DNPP to’o 19/03/2025 husi rezistrasaun hatudu katak estudante por volta 2955 mak halo ona rezistrasaun iha Universidade”, informa porta voz Lino Liliki Vaz iha Kampus Central UNTL, Seunda, 17/03/2025
Nia deklara, hanesan estudante admitidu 2025 iha UNTL, hakarak manifesta sira nia lamentasaun hasoru estrutura Universidade no asosiasaun akadémika estudantil UNTL, ne’ebé organiza prosesu inskrisaun iha UNTL.
“Kriteria rezistrasaun iha fakuldade sira nota katak, fakuldade balun halo kriteria tuir nia vontade, la tuir matadalan, no regra Universidade nian, ema hotu hatene katak orsamentu ba orientasaun akadémika apoia husi Universidade tanba estudante foun selu ona osan 5$ ba Universidade maibé realidade ne’ebé akontese ba estudante foun sira mak akadémika nafatin kobra estudante sira hodi kontribui osan iha ámbitu orientasaun”, dehan nia
Portavoz ne’e hatutan, komisaun organizadora halo tratamentu la dignu ba estudante foun liu-liu iha rejistrasaun fakuldade, tanba tuir lolos regra sira ne’e bele aplika orientasaun akadémika.
“Situsaun sira ne’ebé ami mensiona, ami halo ona karta ba senadu jéral UNTL, no hasoru direita maibé to’o agora ladauk iha resposta ne’ebé klareza, tanba ne’e liu husi komunikadu imprensa ida ne’e ami hakarak husu senadu jéral atu enkontru urjente ho senadu fakuldade sira hodi avalia fila fali prosesu rezistrasaun ne’ebé la’o iha kada fakuldade, ami mós husu ba komisaun organizadora atu halo atendimentu ida ne’ebé dignu ba estudante sira ne’ebé halo rezistrasaun iha fakuldade, tanba ne’e ami husu ba komisaun organizadora atu devolve fila estudante foun nia osan”, nia salienta
Nune’e nia informa, kada fakuldade sira ida-idak husu osan ho razaun produs kartaun orientasaun, fundu operasional, kamizola fakuldade no seluk tan.
“Fakuldade direitu husu osan $1.00 dólar ba kartaun orientasaun, Fakuldade Filozofia husu osan $1.00 dólar ba kartaun orientasaun, Fakuldade Siénsia Sosiais husu osan $1.00 dólar ba fundu operasional no $2.00 dólar ba kartaun orientasaun total 3.00 dólar, Fakuldade Enjenaria husu osan $15.00 dólar ba kamizola fakuldade, $3.00 dólar ba sapeo akadiru, $3.00 dólar ba bote, $1.00 dólar ba aisar, 0.50 sentavus ba kadernu no lapijeira, $ 2,50 ba kartaun orientasaun total hamutuk $25.00 dólares,” informa nia
Enkuantu fakuldade Agrikultura husu osan $11 dólar ba orientasaun kampu, Fakuldade Medisina no Siénsia Saúde husu osan $1.50 ba kartaun orientasaun, 0,50 sentavus ba kaixa assosiasaun hamutuk $2.00 dólar, Fakuldade Turízmu Artes Industrial Kreativas no Kultura husu osan $5,00 dólar ba bin familiar, $12,00 dólar ba kamizola Fakuldade no $1,50 ba kartaun orientasaun, total $ 18,50, Fakuldade Edukasaun husu osan $8,00 dólar ba kamizola Fakuldade, $1.00 dólar ba sertifikadu, 0,50 sentavus ba kas assosiasaun, 0.50 sentavus ba sirkulasaun atividades no $1.00 dólar ba kartaun orientasaun $11.00 dólares, Fakuldade Siénsia Exatas husu osan $12,00 dólar ba kamizola fakuldade no $5,00 dólar ba bin Familiar, total $17,00 dólares no Fakuldade Ekonomia no Jestaun husu osan kamizola fakuldade $15 dólar, Bina familiar $5 dólar no kartaun orientasaun $1,50 total $21,50.
Porta voz ne’e mós husu ba estrutura universidade liu-liu magnífiku reitor UNTL atu superviziona atividades rejistrasaun fakuldade nune’e bele evita kobransa illegal iha Universidade, karik pontus hirak ne’e laiha resposta mak estudante foun sira nafatin ezije to’o hetan desizaun ne’ebé justu ba sira.
Iha fatin hanesan, Benjamin Geovanio Matos informa, kobransa ilegal ne’e estudante admitidu 2025 lamenta tanba sente ida ne’e buat foun ba sira, tuir matadalan regulamentu orientasaun akadémika nian sira viola no husu osan la tuir orientasaun akadémika nian, nune’e nia husu komisaun organizadora atu devolve fali estudante foun sira nia osan ne’ebé mak sira kontribui ona iha kada fakuldade no
husu ba responsavel sira liu-liu ba magnífiku reitor atu orienta ekipa sira tun direita no fó fila estudante sira nia osan.
“Ami estudante foun ami hatene katak ami nia reprezenta mak assosiasaun akadémika estudantil, tanba ne’e mak ami submete ona karta ba senadu jéral, hanesan reprezentante estudante nian, maibé rezultadu ne’ebé mak ami simu Fakuldade Edukasaun de’it mak devolve osan, maibé Fakuldade 9 seluk seidauk devolve”, hateten Benjamin
Benjamin mós husu ba komisaun organizadora atu servisu hamutuk ho Universidade no reprezenta estudante Assosiasaun Akadémika atu fó fila sira nia osan.
Jornalista: Ekipa Média Mudansa
Editora: Sandi Belo
