(Díli) Comoro- Sekretáriu Estadu Komunikasaun Sosiál, Expeditu Loro Dias Ximenes hala’o abertura ba treinamentu média debate iha kontestu demokrasia ba jornalista na’in 28, kompostu husi feto 11 no mane 17 iha salaun João Paul II, Comoro.
Sekretáriu Estadu Komunikasaun Sosiál, Expedito Loro Dias Ximenes, hatete, hanesan jornalista no hanesan jestór ba média konvensional sira formasaun ida ne’e importante tanba hola tópiku kona-ba debate oinsá simulasaun jornalista bainhira halo debate iha média konvensionais, imi hotu hatene katak avansu teknolojia ida ne’e jornalista sira mós presiza atualiza sira nia performance tantu ida maka presiza hatene komprende no intende kona-ba avansu teknolojia, tanba ne’e mak governu fó apoiu makas ba iha Conselho Imprensa (CI sigla português) fó formasaun ida ne’e bele la’o ho di’ak no iha ajenda ba formasaun ida ne’e hola tema barak.
“Ohin dader ne’e kona-ba importansia husi debate televizivu iha kontestu formasaun ida ne’e no ida fali mós kona-ba oinsá hanesan jornalista presiza komprende situasaun real ne’ebé la’o iha ita nia rai prosesu desentralizasaun ne’ebé la’o, era dizital oras ne’e la’o dau-daun, tanba ne’e jornalista sira ne’ebé servisu hanesan komunidade média tenki prepara an atu bele hasoru dezafius oi-oin ne’ebé sei mosu”, dehan Sekretáriu Estadu Komunikasaun Sosiál, Expedito Loro Dias Ximenes ba jornalista sira iha salaun João Paulo II, Comoro, Segunda 17/02/2025.
Governante ne’e hatutan, IX Governu Konstituisional liu husi SEKOMS hodi tau atensaun ba iha formasaun sira liga ho área dijitalizasaun no liu-liu kona-ba konten ne’ebé iha relasaun ho mundu dizital.
“IX governu konstituisional naftin fó atensaun barak liu hodi fó formasaun iha área dijitalizasaun no liu-liu kona-ba konten ne’ebé iha relasaun ho mundu dizital, hanesan jornalista presiza iha kapasidade tolu ne’ebé importante, kapasidade intelektual, katak nia tenki iha forsa ida ou iha matenek ida atu halo analiza bainhira nia halo notísia ida, kapasidade professional ne’e mai husi formasaun, tanba ne’e formasaun ida ne’e atu bele aumenta di’ak liu tan kapasidade professional ba kolega jornalista sira, no kapasidade téknika ho avansa teknolojia ita tenke atualiza ita nia an iha kontestu dizital ne’ebé la’o makas”, hakotu SEKOMS.
Estajiadu: Timotio Belo
Editora: Sandi Belo
