(Díli) Largo Lecidere– Viajen moris tenke hala’o ho entusiasmu no nunka rende bainhira hasoru difikuldade, Se nunka koko, entaun sei la hatene limite sira to’o iha ne’ebé. No luta ho determinasaun maka’as, tanba iha luta hotu-hotu tenke iha rezultadu ida ne’ebé satisfaz.
Negosiante Ermeinda Soares hanesan faluk ida ne’ebé forsa halo negosiu iha dalan ninin hodi sustenta nesesidade uma laran no oan nia futuru, maske loron manas, udan no anin bo’ot nia nafatin forsa hodi luta mesak ba oan nia futuru.
Negosiante ne’e haktuir, nia fa’an sasan ida ne’e tanba nesesidade uma laran no oan nia eskola, ho nune’e nia hakas an halo negosiu iha dalan ninin.
“Osan hirak ne’ebé mak ha’u hetan ne’e uluk ha’u servisu iha sanesamentu dasa rai iha Largo Lecidere no kada fulan hau hetan $115 dólar no osan hirak ne’e mak ha’u hodi sosa fali sasan ba halo negosiu ne’e”, dehan inan faluk ne’e ba ekipa média mudansa iha Largo Lecidere, Kuarta, (12/02/2025)
Nune’e nia deklara, sasan ne’ebé nia fa’an mak hanesan kafe, suprami, sigaru, popmie no bee.
“Kafe ha’u sosa plástiku ida $2.00 no ha’u faan fali kopu ida ho sentavus 0,25, supermi sosa dos ida $6,075 sentavus no ami fa’an bungkus ho sentavus 0,25, sigaru LA slop ida ami sosa $17.00 no faan fali masu ida $2.00, be’e dos ida $2,50 sentavus fa’an ida 0,25 sentavus no kada loron ha’u hetan $5 dólar”,haktuir faluk ne’e
Negosiante ne’e relata, benefisiu ne’ebé hetan uza hodi sustenta oan sira nia eskola no mós ba nesesidade uma laran no kada loron inan faluk ne’e sempre fó osan ba oan sira ho sentavus 0,50 ou dólar $1.00 ba selu bemo ba eskola no fila ba uma.
“Uluk ami sei dada lona iha ne’e rendimentu ne’ebé ami hetan kada loron dólar $20 resin no depois de guarda munisípiu sira desloka ami ba iha Manleu ne’eba no fó fatin ba ami metru 2×50 no ami halo tiha keos no fa’an sasan maibé ema la sosa, tanba ne’e ami nafatin faan iha Largo”, nia konta
Nune’e nia haktuir, difikuldade ne’ebé nia hasoru durante ne’e mak guarda munisípiu sira sempre duni sira no dalarua atrapalla halo sira nia sasan hanesan termus monu rahun hotu no guarda munisípiu sira fó atensaun ba sira bainhira fa’an iha ne’eba labele tau meza no halo Baraka, sira bele tau iha fatuk leten de’it
“Bainhira sira muda ami ba fa’an iha manleu ne’eba ami fa’an loron tomak hetan de’it $2,50 sentavus no ami selu tia bemo hela de’it mak dólar $ 2.00, ami atu selu ba kompañia moris rasik ne’ebé ami kredit mós ladiak tanba rendimentu ne’ebé ami hetan menus liu no Xefe moris rasik sira to’o ami nia uma siak ami ho oan sira no dehan ita bo’ot sira hatene foti osan selu lahatene no ami dehan situasaun mak halo ami la selu laos ami mak lakohi selu no ami sei esforsu atu selu”, nia haktur
Inan faluk ne’e informa tan, osan ne’ebé nia uza ba fa’an ne’e nia kreditu husi kompañia Moris Rasik no nia foti osan hamutuk dólar $2.500 no kada semana nia seluho dólar $66.
Entretantu negosiante Erminda Soares ho idade lima nulu resin ne’en (56) no katuas oan fila hikas ona ba Na’I nia kadunan Santu iha tinan 2016, no inan faluk ne’e origen husi munisípiu Lautém suku Daudere aldeia Alafa, enkuantu Erminda Soares iha oan nain ha’at (4) kompostu husi feto (2) no mane nain (2).
Jornalista: Ekipa kopertura
Editora: Sandi Belo
