(Dili) Largo de Lecidere – Maske Governu Bandu hodi labele fa’an iha fatin públiku, no aplika tuir lei 33/2018 konaba ijiene no ordem públiku konaba labele fa’an sasan arbiru iha fatin públiku maibe negosiante balun kontinua fa’an iha fatin públiku tamba nesesidade moris inklui mos laiha fatin ba sira atu fa’an iha merkadu sira.
Tuir negosiante Afania Saldanha katak, produtu ne’ebe mak nia fa’an hanesan kafe, Sigaru no white coffe, liu-husi negosiu ki’ik hodi bele sustenta nia hanesan selu koos no selu labarik sira nia eskola tamba nia hanesan empregadu no mos hare ba necesidade uma laran.
“Negosiu ne’e ha’u aprende rasik, iha ne’e ha’u fa’an white kofe ho good day, tamba rendimentu kada loron ha’u hetan menus liu mak dollars amerikanu $7 (hitu), no barak liu mak dollars amerikanu $10 (sanulu) ba leten, no rendimentu refere uza ba labarik nia eskola inklui mos nesesidade uma laran nian ” Hateten Afania Saldanha ba jornalista Media Mudansa iha Largo de Lecidere,Quarta-feira 5/02/2025.
Nune’e negosiante Afania Saldanha deklara katak, difikuldade ne’ebe mak nia hasoru durante hala’o negosiu maka dalaruma ekipa Guarda Municipiu de Díli duni sira iha fatin refere tamba fatin ne’e governu Bandu , maske nune’e ho pasensia tenki foti sira nia sasan hodi buka fila fali fatin seluk ne’ebe seguru hodi bele hala’o sira nia negosiu.
“Maluk sira ne’ebe mak fa’an hanesan ha’u karik la bele moe no esforsu an nafatin maske ema la sosa barak hakarak ka lakoi ita tenki hala’o negosiu oituan atu bele sustenta nesesidade loro-loron,”nia rekomenda.
Entretantu negosiante Afania Saldanha idade 34 (tolu nulu resin-ha’at) no Orijen husi Munisipiu Baucau, Postu Administrativu kelikai, suku Abu, aldeia Avo Matebian, enkuantu Afania Saldanha iha oan feto nain rua (2) ida eskola Ensino primaria Nu’u laran, no dadaun ne’e klase haat (4) no ida seluk sei ki’ik.
Ekipa Kobertura Media Mudansa.