(Díli) Palasiu Governu- Esforsu hotu-hotu ne’ebé halo ohin sei sai memória midar iha tempu susesu nian, no susesu la presiza hein to’o idade to’o, se bele susesu iha idade ki’ik, Negosiante Dirsialita Soares, hanesan feto Ida ne’ebe pontensial no forsa ho idade sanolu resin-sia (19) buka rasik osan liu husi negosiu ki’ik hanesan fa’an sigaru no pulsa iha dalan ninin, tamba hakarak hakaman familia nia forsa inklui mos suporta nia estudu.
Tuir negosiante Dirsialita Soares deklara, ho distansia ne’ebe mak do’ok husi inan ho aman laiha dalan seluk atu hatutan moris iha sidade Díli, tamba ne’e nia koko esforsu atu motiva nia a’an liuhusi negosiu iha dalan ninin hanesan fa’an sigaru no pulsa ne’ebe bele fó apoiu ba nia nesesidade loron hanesan estudante universitariu inklui mos bele apoiu nia familia.
“Hau hakarak loke negosiu no buka rasik osan hodi kaman hanesan selu bemo, foto kopia, no seluk tan, no buat ne’ebe mak ha’u sente todan mak ha’u foin bele husu ajuda husi familia Inan aman Sira,” Dehan negosiante Dirsialita Soares ba Jornalista media mudansa.
Nune’e nia haktuir, osan ne’ebe nia hodi halo negosiu antes ne’e nia husu iha nia inan aman, hodi halo negosiu iha dalan ninin, liuhusi fa’an sigaru no pulsa atu nune’e bele hakaman nia nesesidade loro-loron hanesan estudante no bele mos oferese ba nia inan ho aman ne’ebe hela iha foho.
“Sigaru L.A ha’u Sosa Slop ida (1) ho nia montante dolares amerikanu sentavus liman nulu ($16,50) no fa’an fali masu ida dolare amerikanu rua ($2.00) no fa’an mos rahun lulun Rua(2) 0.25 sentavus no eslop ida hotu, ne’e ha’u hetan funan mak $10, no marboro ha’u sosa eslop ida $21.50 sentavus no fa’an fali masu ida $2.50, funan ne’e hetan $13.00, no kada loron ha’u hetan $10 ou $15 dolar ida hanesan ne’e, maibe depende deit ba situasaun tamba ema barak mak halo negosiu ki’ik sira hanesan ne’e, ne’ebe depende deit ona ba sorte ne’ebe ita hetan, “nia subliña.
Nia konta, hala’o negosiu Ida ne’e tinan ida resin ona no benefisiu ba Nia mak bele uza selu bemo no hodi foto kopia materia Sira.
“Difikulta ne’ebe ha’u pesoal hasoru mak kada ves ema mai sosa sigaru iha ha’u ne’e hanesan kolega seluk hare ha’u ho oin bo’ot, tamba ema sosa ne’e buka deit feto, maibe ha’u la sente buat sira ne’e atu akontese no dezafiu hirak ne’e hau sei la tauk no la rende” Dirsialita konta.
Nia hatutan, benefisiu ne’ebe nia hetan husi negosiu ne’e rasik mak hanesan, hodi suporta nia estudu no suporta mos nesesidade lor-loron nian.
“Futuru mai ha’u sei kontinua hala’o nafatin negosiu ida ne’e karik ha’u seidauk hetan servisu tamba liu husi buat hirak ne’e mak sai hanesan dalan ida ne’e dahuluk mai atu atu buka osan,”dehan Nia.
Negosiante ne’e salienta, antes ne’e nia hala’o uluk negosiu fa’an aimoruk liuhusi sosial media, hanesan aimoruk produk herbal sira, no liu husi via telemovel ka online, no agora nia lakoi kontinua fa’an tamba difikulta ba pulsa
“Ha’u nia lakoi rekomendasaun ba kolega sira no espesial liu ba feto maluk sira labele moe atu halo negosiu ki’ik sira hanesan, tamba moris sei la permanente ho ita nia Inan Aman no familia sira, no labele koko bei-beik atu depedensia husi Ita nia familia sira no ita mos tenki koko ita nia Aan atu la’o mesak” nia salienta
Entretantu Negosiante Dirsialita Soares origen husi munisipiu Lautem postu Administrativu Ilomar suku Tirlolo Aldeia Etewake no daudaun ne’e halo hela estudu iha banku Universidade Oriental Timor Lorosae (UNITAL), fakuldade Edukasaun departamentu Ingles no semester tolu (3),
Jornalista :Zemidonio Martins.
Editor :Sandi Bello
