PAM-Dili Resigna A’an Husi Kargu Tamba Iregularidade Administrativu no Finanseiru. 

banner 120x600

(Díli) Mudansa – Prezidente Autoridade Munisipál Dili (PAM-Dili) Gregório da Cunha Saldanha (Mouris) Liu husi konferensia Imprensa hateten, Desizaun ne’ebe nia foti maske todan, maibé nia tenki foti tamba situasaun balun.

” ha’u sei esplika hanesan tuir mai ne’e: Kontestu no Motivasaun: Iregularidade Administrativu no Finanseiru, Durante ha’u-nia mandatu, ha’u hasoru iregularidade grave sira iha prosesu administrativu, inklui falsifikasaun dokumentu no prosesu sira ne’ebé duviduzu” Hateten Prezidente Autoridade Munisipál Dili (PAM-Dili) Gregório da Cunha Saldanha (Mouris) liu husi konferensia Imprensa Ba Jornalista Sira, Tersa feira 28/01/2025.

Gregório da Cunha Saldanha (Mouris)

Nia deklara nia preukupa Liu iha servisu rekolla lixu manual, ne’ebé identifika tinan ida halakon osan Estadu ho dólar Amerikanu millaun ida.

” Dadus sira-ne’e fasilita husi relatóriu sira, rejistu husi sistema automátiku Tibar nian no evidensia fotográfiku no videográfiku husi fulan Agostu 2023 to’o Agostu 2024. Foin loron hirak liu ba Sua Exelénsia SEATOU konfirma rasik, wainhira halo verifikasaun surpreza ba’a kamioneta tula lixu nian sira ” Nia agresenta

Karta Konferensia Emprensa husi PAM-DILI

Nia Subliña Ministériu Administrasaun Estatal (MAE) estraga kapasidade atu prepara didi’ak desentralizasaun poder lokál, tuir polítika Governu IX nian. No Iha fulan Setembru tinan 2024, Nia husu ba Ministru Administrasaun Estatal atu halo auditoria ba servisu Autoriedade Munisípiu Díli (AMD) nian. Maibé, auditoria ne’e foin hahů iha fulan Dezembru tinan 2024 .

“ha’u seidauk simu Informasaun ruma kona-ba ninia rezultadu. Situasaun ida-ne’e fo impaktu no trava implementasaun medida koretiva sira ne’ebé urjente.” Nia deklara.

Nia Lamenta Desizaun Unilaterál no Falta Koordenasaun Intensaun atu transfere unidade Project Management Unit (PMU) husi AMD ba MAE prejudika kapasidade atu superviziona téknikamente servisu limpeza urbana.

” Piór liu tan, MAE halo estensaun kontratu empreza limpeza sira, sem konsulta uluk ho AMD. Ida ne’e hamate esforsu sira ba melloria no prejudika ijiene no saúde públiku sidadaun Dili nian” Nia argumenta

Nia afirma Diresaun Jestaun Merkadu no Turizmu (GMT) ne’ebé halao serbisu munisipál nian, tuir lolós submete ba’a Autoridade Munísípiu Díli, maibé infelizmente SEATOU maka kontrola lor-loron hodi atua ho violénsia hasoru vendedores ambulantes ka komunidade kiak sira ne’ebé hela iha espasu públiku ho sira nia sasân.

” Hanesan konsekuensia, AMD maka hetan fali kritiku no akujasaun husi públiku hanesan autór no responsável. Hanesan sidadaun, veteranu no Prezidente Autoridade Munisipal, ha’u labele simu prátika violentu sira neʼebé haterus tan sidadaun Dili, sem kria uluk kondisaun minima alternativa, Ami rejista katak, situasaun ida ne’e atu repete fali prátika desumanu sira ne’ebé uluk ema rai seluk sira halo hasoru ita nia povu, hahalok iresponsável ne’ebé ita nunka konkorda to’o ita manán Independénsia “Nia hakotu.

 

Ekipa Média Mudansa (MD) 

 

banner 325x300