Díli Mudansa-Conselho de Imprensa (sigla portuguȇs CI) no Polísia Nasionál Timor-Leste (PNTL) Asina Nota Entendimentu ho objetivu atu promove Liberdade Imprensa no Liberdade Espresaun iha Timor-Leste.
Prezidente Conselho de Imprensa, Otelio Ote hatete, asina nota entendimentu ida ne’e hanesan eventu ne’ebé importante no istóriku iha relasaun institusionál entre CI no PNTL.
“ Ohin loron meius komunikasaun sosiál ne’ebé eziste iha Conselho de Imprensa hamutuk 57 no jornalista sira ne’ebé rejistu iha Conselho de Imprensa no atribui ona karteira profisional besik ema 400, husi númeru média no jornalista ida ne’e kontribui makas ona, liu-liu bazeia ba papel média konvensional mak nu’udar meius ida atu informa, eduka, kontrola no diverte, CI bazei ba lei no dekretu lei atu hametin ka tau importansia no atensaun ba sidadun sira atu asesu ba informasaun ne’ebé mak asegura katak iha liberdade imprensa no liberdade ba opiniaun, tenki asegura jornalista sira halao sira nia kna’ar tuir padraun kodigu étika jornalista no tenki asegura mós kata CI estabelese diálogu di’ak ho meius komunikasaun sosiál sira, sosiedade sívil no instituisaun estadu”, dehan Prezidente Conselho de Imprensa, Otelio Ote, iha salaun CI, Kintal Bo’ot, Díli, Kinta 21/11/2024.
Prezidentene’e hatutan, CI tenki asegura katak servisu hotu ne’ebé halao bazeia ba lei no protesaun liberdade imprensa no atu haburas demokrasia, tanba ne’e mak desde 2019 CI koko atu halao komunikasaun no relasaun ho PNTL.
“Hanesan ita hatene meius komunikasaun sosiál no PNTL nu’udar instituisaun ida ka komunidade ida ne’ebé iha papel hanesan atu atinje sosiedade ida livre no responsabilidade, tanba ne’e ho nota entendimentu ida ne’e sei lori ita atu iha koñesimentu no entendimentu hanesan kona-ba meius komunikasaun sosiál no pratika jornalístika, no kona-ba oinsá Polisía Nasionál Timor-Leste atu atu kazu sira ne’ebé relasiona ho produtu jornalístiku”, nia hatutan
Iha fatin hanesan Komandante Jeral PNTL Komisario Jeral Henrique da Costa hatete, iha 2019 iha ona akordu entre CI ho PNTL, ne’ebé mak iha tempu ne’eba asina husi komandante jeral sesante no ida ne’e remata, hare’e katak ida ne’e importante tebes atu kontinua akordu ida ne’e no iha pontus importante balu ne’ebé mak presiza hatama tan iha laran, atu nune’e akordu ne’e bele fó benefísiu mós ba ekipa rua ne’ebé mak asina akordu ne’e hodi halo servisu di’ak liu tan.
“ita hatene katak papel PNTL nian importante tebes maibé papel média nian mais importante liu tanba iha situasaun balu ne’ebé mak dala ruma polisía labele tama, dala ruma média buka meius oinsá sir abele tam iha ne’eba, iha situasaun balu ne’ebé mak polisía labele to’o ba iha fatin sira ne’e, maibé ho sira nia prezensa informasaun bele públika sai hanesan mós meius ida ba PNTL ka ba iha komandante sira hodi orienta membru sira atu responde kedas ba iha informasaun ne’ebé mak fó sai iha média, ita hare’e ida ne’e importante tebes no ita respeita ida-idak nia kna’ar”, dehan Komandante Jeral PNTL.
Nune’e nia hatutan, dala ruma la iha komunikasaunne’ebé mak di’ak no la iha kordenasaun ne’ebé mak di’ak no dala ruma polisía la dún komprende kona-ba papel média nian ou dala ruma média sira mós la komprende kona-ba papel husi PNTL nian.
“Iha buat importante ida ne’ebé sei asina mós iha akordu ne’e mak sensibilizasaun no formasaun ruma atu nune’e média sira mós hatene kona-ba papel polísia nian, nune’e polísia sira mós hatene kona-ba iha papel média sira nian, ida ne’e ekipa rua sei esforsu hamutuk atu nune’e oinsá bele realiza formasaun sira ne’e, tanba iha atividade seluk mós polísia presiza média nia prezensa, tanba ita bo’ot sira sai mós hanesan matan no tilun ba iha polísia sé la liu husi ita bo’ot sira dala ruma ami nia mensajen sira sei la to’o iha komunidade sira”, nia akresenta.
Enkuantu Sekretáriu Estadu Komunikasaun Sosiál Expedito Loro Dias Ximenes hatete, koalia kona-ba objetivu principal husi nota entendimentu ohin nian atu oinsá bele hametin liberdade imprensa ho liberdade espresaun.
“Serimónia ohin ne’e ita bele hatudu ba públiku katak oinsá PNTL ho Komunidade média ne’e sai parseiru estratejiku tanba PNTL hanesan orgaun estadu ne’ebé hatur ordem no seguransa iha públiku no média liu husi Conselho de Imprensa hanesan orgaun estadu nian ne’ebé independente no mós reguladór ba iha produtus jornalístikus Timor nian”, tenik SEKOMS
Jornalista: Zemidonio Martins
Editora: Sandi Belo
