(Dilí) Mudansa-Sekretariu Estadu Komunikasaun Sosial (SEKOMS) ho Ministeriu Administrasaun Estatal (MAE) hamutuk Igreja lansa portal fasilita prosesu akreditasaun bá jornalista Nasional no Internasional hodi asesu bá kobertura eventu istóriku vizita sua Santidade Papa Fransisco mai Timor-Leste.
Sekretariu Estadu Komunikasaun Sosial, Expedito Dias Ximenes hatete, husi lansamentu ida ohin oinsá mak ekipa média vizita sua Santidade Amu Papa Fransisco, iha prosesu akredisaun bá média nasional ho internasional, hanesan ema hotu hatene katak vizita husi Amu Papa nian mai iha Timor-Leste iha signifikadu esperitual no kultural ne’ebé bo’ot tebes bá sarani no povu Timor-Leste.
“Iha eventu ida ne’e, la’os deit atu hametin ita nia fiar, maibé mós atu halibur ita hanesan nasaun hodi selebra paz, solidariedade, fraternidade ba povu Timor-Leste liu-husi prenzensa Amu Santu Padre, nu’udar sinal bensaun no esperansa iha momentu ida ne’ebé ita hein ho esperansa ne’ebé bo’ot tebes,”Dehan SEKOMS ba jornalista sira, iha Edifisiu Eskritóriu Komisaun Organizadora, Motael-Dili, Tersa-Feira (16/07/24)
Governante ne’e akresenta, sira sei haree ba prosesu akreditasaun liu-liu kona-ba kriteiru ne’ebé mak atu berefika ba média vizita Amu Papa nian, tanbà liu husi lansamentu ba prosesu akreditasaun ida ne’e, sira sei halo berefikasaun detallu ba dadus no dukumentus sira ne’ebé jornalista sira sei submetebá halo berefikasaun inklui mós autensidade bá informasaun Klara no lós hodi valida fila fali dukumentus ne’ebé jornalista sira hato’o.
“Limitasaun espasu ba jornalista sira atu halo kobertura, ho ida ne’e mak programa vizita Amu Papa nian ne’e, asegura diak liu tan kobertura jornalista ne’ebé organizadu no aseguradu ne’ebé diak professional hodi avalia mós kuantidade ba kolega jornalista hodi halo kobertura, maluk jornalista sira sei simu akreditasaun no simu distribuisaun bá eventu husi programa sira ne’ebé vizita Amu Papa nian, ami mós kria regulamentu ida ba akreditasaun ne’e bá iha kuantidade jornalista sira nian iha eventu ka espasu ne’ebé Amu Papa sei vizita,”Governante esplika
Iha fatin hanesan,Arsebispu Metropolitana Dili,Dom Virgilio Cardeal do Carmo da Silva mós hatete,ohin liu husi eventu ida ne’e hodi lansa akreditasaun ba média nasional nian, bele dehan katak tau ona fatuk inan ida ne’ebé importante tebes iha preparasaun bá vizita Amu Papa nian atu fó hanoin mai ema hotu katak, hakarak hatudu duni ba mundu liu husi buat ne’ebé diak no kualidade liu husi identidade nu’udar nasaun ida.
“Liu husi akreditasaun ida ne’e, hakarak atu tais duni ida ne’ebé soin no bele mak fó sai mensajen ka imajen bo’ot liu husi ita nia média sira,ami nia parabens bá responsavel sira liu-liu Sekretariu Estadu Komunikasaun Sosial (SEKOMS), ne’ebé ohin konvida ita hotu mai iha ne’e hodi lansa akreditasaun hodi ajuda ita hotu bele prepara ita nia an diak liu tan hodi simu ita nia Santu Padre,bom susesu no bom traballu bà média sira hotu hodi lori Timor ba iha mundu liu husi informasaun ne’ebé jornalista sira fó sai kona-ba vizita Amu Papa nian, ho tema vizita Amu Papa nian katak, (Que A Vossa Fé, Seijá A Vossa Cultura),”dehan dehan Arsebispu Metropolitana Dili,Dom Virgilio Cardeal do Carmo da Silva
Iha sorin seluk,Ministru Administrasaun Estatal (MAE) Tomas do Rosario Cabral mós hatutan, ohin marka eventu ida ba kredensial faze importante ida servisu ne’ebé média atu halo kobertura ba eventu ida ne’ebé importante.
“Média nia servisu mós importante tebes iha eventu ida ne’e, nune’e mós ita sei simu média internasional sira mai husi rai liur inklui kobertura husi média nasional sira nian ne’ebé ita nia populasaun hein hela informasaun husi jornalista sira,”katak nia
Governante ne’e,husu ba média sira liu-liu média lokal sira tenke servisu ho professional hodi halo kobertura ne’e masimu teb-tebes,tanba kondisaun mak ida ne’e,maibé iha Tasi tolu ba oras ne’e atinji ona %80 besik hotu ona,iha deit servisu ba finalizasaun no média senter depois sira sei monta sentru bà sekretariadu vizita Amu Papa mak ida ne’e.
“Ita kontribui ba susesu ida ne’ebé ita hotu hein nomós susesu ba jornalista sira hotu hodi lori informasaun ba ita nia populasaun,” MAE Tomas Cabral hakotu
Jornalista:Ana Ribeiro/Inacio Silva
Editóra:Delfina Borges
