(Dilí) Mudansa-Negósiante Evarista Barros hili dalan hakarak halo negosiu hodi seluk eskola iha nivel Universidade.
“Negosiu ne’e importante tanbá buat hotu-hotu presija osan no presija saída de’it tenki uza osan, ha’u kria rasik negósiu ne’e la’os uza ho osan bo’ot, maibé hahu negósiu ho de’it aimanas balde rua hodi hala’o negósiu ha’u hetan osan uituan hodi hala’o ha’u nia estudu iha Universidade da Paz (UNPAZ) iha tinan 2021,”dehan negosiante Evarista Barros bá Jornálista Media Mudansa iha Kaikoli Kuarta-Feira (09/07/24)
Negosiante Evarista konta, nia hahu halo negosiu iha tinan 2020 to’o tinan 2021 hetan rendimentu ituan nia hahú sosa fali sasan seluk hodi faan.
“Ha’u hahú halo negosiu ija tinan 2020 to’o 2021 rendimentu ne’ebé ha’u hetan kada loron ho dollar sanulu ($10.00) ba leten hodi sosa fali sasan sira hanesan kafé, biskuit, be’e aqua nst…hodi faan mai to’o agora,”Nia subliña
Nia haktuir sasan ne’ebé nia faan bazeia bá tempu ne’ebé nia iha fahe tuir oras hodi bá tuir nia aula.
“Ha’u faan sasan hare tuir orariu aula nian, oras livre ha’u seu faan karik ha’u iha aula no ha’u husu ajuda alin hodi kontinua hein sasan sira, hafoin ha’u fila hosi eskola troka fali alin,” Nia informa
Nia akresenta, dezafiu ne’ebé nia hasoru durante halo negosiu ladun hetan rendimentu ne’ebé di’ak.
“Dezafiu ne’ebé ha’u hasoru mak Ekonomia ladun sufisiente bá nesesidade lor-loron relasiona ho sasan ne’ebé ema sosa ho rendimentu ne’ebé ha’u hetan uitoan de’it, to’o bá selu ha’u nia eskola ha’u selu kompletu dala-ruma mós selu “sisilan” de’it, tanbá ladun hetan rendimentu diak husi negósiu ne’e rasik, no husi ha’u nia familia hakarak fó apoiu eskola, maibé ha’u lakohi ho razaun hakarak selu rasik eskola ho buat ne’ebé mak ha’u esforsu rasik no rezúltadu ne’e mak uza mós saí hanesan esperiénsia ida bá ha’u iha futuru oinsá mak bele hamrik mesak sein husu ajuda bá ema seluk,”Nia relata
Negosiante Evarista ne’e mós husu bá maluk estudante sira, labele moe atu buka osan no mós labele moe atu ajuda ema seluk,tanbá ajuda ema seluk importante loron ida ema seluk sei ajuda fali.
Negósiante Evarista Barros ho idade ruanulu resin-haat (24) oan hosi aman João da Costa Barros, inan Filomena Fernandes, Evarista iha maun alin nain sanulu resin-ida (11) kompostu hosi mane lima (5) no feto neen (6) nia rasik mak oan bá dala lima (5) husi maun alin nain 11 nia husi hosi Munisipiu Bobonaru no dau-daun Evarista hela ho familia iha suku Kaikoli.
Jornalista : Inacio Silva/Estajiada Nelia Pereira
Editóra : Delfina Borges