Armindo : Liu Husi Pinera Rai-henek Hodi Aguenta Nia Moris

banner 120x600

(Dilí) Mudansa– Traballadór Armindo Monteiro, hala’o servisu pinera rai-henek hodi sustenta nia moris.

Armindo Monteiro idade (63), orijen husi Munisipiu Viqueque, Postu Administrativu Ossu, Suku Builale, Aldeia Kaitara-Hu’u.

Tarbalhador ne’e haktuir, husik hela nia família sira hodi mai buka moris iha sidade Dili hahú iha tinan 2001 to’o agora.

“Moris iha foho buka osan susar oituan tanbá ne’e ha’u foti desizaun mai iha kapitál Dili hodi buka osan atu bele sustenta ha’u nia moris,”dehan Armindo ba Jornalista Mudansa iha fomento 1,Tersa-Feira (09/07/24)

Nia haktuir, tinan 2001 nia hala’o servisu hanesan tula bataku bá kareta durante tinan naruk nia laran, no nia senti servisu ne’e todan liu nia sai husi servisu refere.

“Ha’u husik tiha servisu tula bataku ne’e hodi maí servisu hanesan pinera rai-henek loron tolu ema mai tula foin hetan osan kada rai-henek reet ida (1) hetan osan ho montante dollar rua-nulu ($20.00), liu hosi osan ne’e bele uza bá semana ida hola hahan hanesan fós, Modo no seluk tan,” Armindo konta

Traballadór ne’e sublina, família komunika nia liu husi via telefone haruka atu fila bá knua,maibé lakohi,tanbá hakarak buka osan iha sidade lakohi tane liman bá família sira.

“Ha’u nia maun bo’ot iha foho servisu hanesan hein animal familia sira mós la mai vizita ha’u iha Dilí, ne’ebé ha’u sente hanesan moris mesak no laiha ema Ida atu hamaluk hau,” Tenik nia

Nune’e mos nia hatutan,uma ne’ebé nia hari’i hodi fó mahon bá nia husi anin, loron, udan, no sasan sira ne’e nia hili husi lixu Fatin (sampa).

“Sasan ne’ebé hili iha lixu mak hanesan kalen rohan, lona aat, tripleks rohan, kaixa, hirak ne’e halo netik uma ida hodi satan an husi anin, udan no loron manas no uluk ha’u hela iha ponte okos hela ho rian Faustino udan bo’ot mota tun sobu ami nia hela fatin, sasan sira bee lalin hotu,momentu ne’ebá nia hetan ajuda husi parte relavante sira fó nesesidade baziku hanesan fós, supermi, iha fatin akontesimentu,”Nia konta

Armindo afirma, husi tinan 2021 nia mai hela iha area mota ninin hodi pinera rai-henek dadeer la matabisu direitamente bá pinera rai-henek depois oras meudia halai maí uma tein han tiha la deskansa kontinua hala’o servisu.

“Loron ida ha’u han dala-rua meudia ho kalan ha’u hola fós karon ida labele,tanbá ne’e ha’u hola rahun de’ít osan la to’o atu hola foos karon tomak,” Tenik nia

Nia mós rekomenda bá parte Governu hanoin nia karik fó kalen hodi halo nia uma karik la fó mós la obriga.

“Hau nia rekomendasaun ba governu hanoin ha’u krk fó netik kalen tahan ida mai ha’u hodi halo uma karik la fó mós ha’u la obriga, tanbá la’os ha’u de’it mak ki’ak maibé ha’u hatene ema ki’ak mos barak,” Nia sujere

Iha sorin seluk Evanzelino da Silva hanesan sasin bá traballadór Armindo Monteiro nia haktuir, Armindo Monteiro durante ne’e moris mesak de’it laiha família ida maí vizita nia.

“Liu hosi servisu pinera rai henek nia hetan osan hodi sustenta nia nesesidade loron-loron,maibé nia la lakon vontade nafatin hakas-an hodi luta bá moris ne’e,”Evanzelino da Silva hakou

Jornálista : Zemidonio Martins/Estajiada Ligia Bruno.

Editóra : Delfina Borges

banner 325x300